Lars-Emil Johansen mianersoqqusisoq
Qaasuitsup Kommuniata Ilulissani suliniummik Newportimik taaneqartumik, umiarsualivimmik, mittarfimmik akunnittarfimmillu sanaartornissamik imaqartumik, aallaavittullu aningasaliisartunit avataaneersunit aningaasalersorneqartussamik unitsitsiinnartariaqarnera KNR-imit ippassaq tusarliunneqarpoq.
Namminersorlutik Oqartussat maanna mittarfioreersumut taamaallaat qularnaveeqqusiisussaagaluarput.
AAMMA ATUARUK Dorphip pilersaarusiarsuaq unitsittariaqarpaa
Tamannalu qisuariaateqarfigalugu Inatsisartut siulittaasuat Lars-Emil Johansen ima allappoq:
- Naalakkersuisunngooq Ilulissani mittarfissarsualiornissamut avataanit aningaasaliiniartunut itigartitsipput, taama KNR radioaviisi ilisimatitsivoq. Nutaarsiassaq taanna ilumoortuusimappat periarfissaq manna atorlugu Naalakkersuisut qinnuigissavakka isummersimanertik naliliiffigeqqeqqullugu kiisalu paasiniatsiaqqullugu ilumut Inatsisartuni tunuliaquttaminnit tapersersorneqarnerlutik apeqqummi ima inuiaqatigiinnut pingaaruteqartigisumi isummernerminni, Lars-Emil Johansen tusagassiorfinnut nalunaaruteqarluni taama allappoq.
Eqqarsarnartoqartikkaa
- Eqqarsarnartoqarteqaara Naalakkersuisut sanaartugassanut avataanit aningaasaliiniartunut taama inussiarnisaanngitsigisumik pissusilertualernerat. Ilulissani mittarfissualiornissaq suliassaavoq pingaarutilissuaq pimoorullugu isummerfiginiarneqartariaqartoq, Lars-Emil Johansen taama naggasiivoq.
Newportimik pilersaarummut maanna unitsiinnarneqartumut atatillugu mittarfiliornissap 945 millionit koruunit missaannik akeqarnissaa missiliuutaavoq, avataanillu aningaasaliisartunit aningaasaalersorneqarnissaa pilersaarutigineqaraluarluni.
AAMMA ATUARUK Qaasuitsup Kommunia takinerusumik mittarfeqalerusuppoq
