Qaasuitsup Kommunia takinerusumik mittarfeqalerusuppoq
Qaasuitsup Kommuniata pisortaanerata Hans Eriksenip nassuerutigaa, Naalakkersuisut siunniussaannut allaanerusumut sanilliullugu kissaatertik piviusunngortinneqarsinnaanngitsoq.
Aamma atuaruk Mittarfiit nunarput ataatsimoortissavaat
- Ilulissani timmisartoqarfiup allilerneqarnissaa 2012-imiilli ukioq manna tikillugu, pilersaarutinik assigiinngitsunik ingerlatsivigisimasarput taamaatiinnarnikuuvarput. Taamaaliorpugut Naalakkersuisooqatigiit inassuteqaatiginiakkaminni siunniummassuk timmisartoqarfiit Ilulissani Nuummilu tallineqarnissaat siunniunneqarluni, Qaasuitsup Kommuniani pisortaaneq, Hans Eriksen KNR-imut taama oqarpoq aamma kommunip nammineerluni mittarfiup tallineqarnissaanut aningaasatigut periarfissaqannginnertik erseqqissaatigalugu.
Aamma atuaruk Visit Greenland: Asfalti takornariat pilerigisarinngilaat
- Naluneqanngilaq Qaasuitsup Kommunia aningaasatigut ilungersunartorsiortoq. Kisianni tassa Ilulissani mittarfiup tallilerneqarnissaanut aningaasaleerusuttut arlallit nalunaareeraluarput tamassumunnga ikiuukkusullutik. Kisiannili tassa Namminersorlutik Oqartussat namminneerlutik tallilerinissaminnik oqalulermata tallilerinissarput unitsiinnarparput, Hans Eriksen oqarpoq.
Aamma atuaruk 725 millionit ukiualunni mittarfeqarnissaq qulakkiissavaat
Ilulissani mittarfiup 2800 meterimut tallineqarnissaa Qaasuitsup Kommunianit kissaatigineqaraluarpoq. Tamanna anguniarlugu suliniut Newport, 2012-imi aallartinneqaraluarluni. Suliniummi tassani timmisartunut angisuunut mittarfik, umiarsuarnut talittarfik aamma akunnittarfik nutaaq pilersaarutaallutik. Taakkulu tamarmik takornarianit amerlisaanermut iluaqutaasussatut sanaartorneqartussaagaluarlutik.
Newportip 2012-imi pilersinneqareernerani, nunani allamiut suliffeqarfissuit arlaqartut aningaasaliinissaminnik neqerooruteqarsimagaluartut allaat milliard koruunit missarluinnaanik aningaasaliisinnaasimagaluarlutik, Hans Eriksen oqarpoq.
Aamma atuaruk Borgmesterip mittarfik tallisikkusuppaa
Ilulissanili mittarfiup tallilerneqarnissaa, nunanillu allamiunit pigineqarnissaa, Naamminersorlutik Oqartussanit itigartitsissutigineqarpoq suliniullu taamaalilluni maangaannartinneqarluni.
- Tassa aningaasaleerusuttut 2012-miit piareersimasimagaluarput, Naalakkersuisut akuersiniariarpata suliap aallartinneqarnissaanut. Tassalu tamanna maanna qatagiinnarluni. Tassalu Ilulissani mittarfik pillugu Naalakkersuisut qanoq aalajangiinissaat utaqqineqaannalerluni, Qaasuitsup Kommuniani pisortaaneq, Hans Eriksen taama oqarpoq.
