Mittarfiit nunarput ataatsimoortissavaat
Mittarfinnut aningaasaliinissarsuarmi, Nunarput ataatsimut isigineqarluni ataatsimoortinneqassasoq, Sulisitsisut pisortaata, Brian Buus Pedersenip tikkuarpaa.
- Sumiiffinni anneruniuttoqalerpat kukkunerit akisuut sapinngisaq tamaat pinaveersimatittariaqarpagut, Sulisitsisut pisortaat Brian Buus Pedersen oqarpoq.
Aamma atuaruk Kangerlussuaq ataannassanersoq isumaliuutigaat
Kikkut tamarmik pitsaanerpaamik pineqarusuttarmata, mittarfeqarnerup siunissamik qanoq aaqqissuunneqarnissaanik politikikkut apeqqut misigissusilersorffiusinnaaqisoq, taassuma ilisimaaraa.
- Sumiiffinni anneruniuttoqarani inuiaqatigiit aningaasaqarnerat eqqarsaatigalugu tamakkiisumik eqqarsarnissamut, Naalakkersuisut akisussaaffilerujussuupput, Sulisitsisut pisortaat oqarpoq.
Pingasunik piumasaqaateqarput
Sulisitsisut siunissami mittarfeqarfiit nunatsinni sumiissanersut oqaatigerusunngilaat pingasunilli piumasaqaateqarlutik.
Siullertut assartuussinermut isumalioqatigiissitap isumalitissiissutaani angallannerup aningaasaqarneranik natsorsuinerit tunngavigineqassasut. Takkualu politikkikkut kissaatinut sanilliutseriarlugit, inuiaqatigiit aningaasaqarnerannut pitsaasumik inerneqartussamik aalajangiilluni.
Aamma atuaruk Assartuineq pillugu isumalioqatigiissitaq: Kangerlussuaq Nuummut nuulli
- Aningaasat milliarderpassuit atornissaanut akissaqanngilagut. Pisuujunerulissutigissallugu uppernarsarsinnaanngikkutsigu, tassa tamanna oqaluuseraarput.
Aappaattut timmisartorneq akikinnerulertariaqarpoq. Kiisalu angallannikkut aaqqissussinerput pitsaaanerulertariaqartoq, Sulisitsisut tikkuaapput.
Air Greenland naleqqussarumaartoq
Air Greenlandip pisortaanerup oqaatigaa pilersaarusiat arlaat toqqarneqarpat naleqqussarumaarlutik.
Taassuma aamma tikkuarpaa, pilersaarusiaq naammattumik misissorneqartareersoq. Taannali naapertussagaanni atugassarititaasut aaqqissuussinerillu ilisimaarinissaat, aammalu pilersaarusiornermi piffissalersuinerup ilisimanissaa pingaarnerpaavoq, taamalillutik atortulersuutit qanoq ittuuneri naapertorlugit Air Greenlandimi timmisaartuuteqarsinnaaniassagamik.
Timmisartumimmi pisineq akisoorujussuuvoq, taamaattumik taakkua piffissami sivisuumi atornissaat pisariaqarpoq.
- Taamaanngippammi timmisartumik aningaasaleerusuttussaqanngilaq, taama timmisartut akisutigaat, Air Greenlandip pisortaa Michael Højgaard oqarpoq.
Aamma atuaruk Air Iceland: Qaqortumi mittarfiliortoqarnissaq pisariaqartinneqanngilaq
