Borgmesterip mittarfik tallisikkusuppaa

Nunatsinni mittarfiit pillugit Naalakkersuisut pilersaarutitik ungasinngitsumi saqqummiutissavaat.

Tassunga atatillugu Nuuk Ilulissallu takinerusumik mittarfittaarnissaat oqallisigineqartorujussuupput.

Attaveqarnermut naalakkersuisoq Inatsisartunut periarfissanik marlunnik saqqummiussiniarluni, KNR-imut siornatigut oqarpoq. Periarfissaq siulleq tassaavoq mittarfiit 1199 meterinut tallineqassasut, periarfissallu aappaa tassaalluni mittarfiit 1799 meterinut tallineqassasut.

Takissaaq

Kommuneqarfik Sermersuumi borgmesterip sorleq perusunnerunerlugu nalornissutiginngilaa.

- Kommunalbestyrelsimi ukiarli eqqartornikuuvarput, 1800 meterimillu takissusilimmik siunnerfeqarluta, Kommuneqarfik Sermersuumi borgmesteri Asii Chemnitz Narup oqarpoq, mittarfiullu sukkanerpaamik naammassineqarnissaa neriuutigalugu aamma oqarluni.

Aamma atuaruk 725 millionit ukiualunni mittarfeqarnissaq qulakkiissavaat

Aamma atuaruk Mittarfiit nunarput ataatsimoortissavaat

Naalakkersuisullu isumaqataanngikkunik, kommuni nammineq iliuuseqarniartoq, borgmesterip oqaatigaa.

- Pisortaqatigiit misissuinerannut tunuliaqutseerujussuarpugut, qanorlu aningaasatigut kinguneqassanersoq misissoqqullugu. Aammalu uagut kommuneqarfik kisimiillutaluunniit tallineqarnera akilissagaluarutsigu qanoq aningaasartuutinik annertutiginersunik atorfissaqartitsissanerluta misissoqqullugu, Asii Chemnitz Narup oqarpoq.

Illoqarfimmut Nunatsinnullu pingaarutilik

Nunatsinni timmisartorlutik Nuummiit Københavniliartartut ullumikkut Nunatsinnit angalasut tamakkerlugit 40 procentiisa missaanniipput.

Tamannalu Nuup mittarfiata tallilluarnissaata pisariaqarneranut takussutissaasoq, borgmesteri isumaqarpoq. Nuup mittarfia tallineqarpat Nunatta tamarmiulluni iluaqutigissagaa, taamaammallu aningaasaliilluarnerussasoq, Asii Chemnitz Narupip oqaatigaa, Nuummullu periarfissanik nutaanik ammaassissasoq aamma oqaatigalugu.

- Tallinerani taava, uagut takorloorparput, Keflavik aqqutigalugu nunarsuup sinneranut angallannerit pisariinnerujussuarmik isumagineqartussanngorsinnaassammata, aammalu taamaalilluni takornariaqarnikkut, niuernikkut, ilisimatusarnikkut allatigullu iluaqutissartai qaninneerarsuanngussapput, Asii Chemnitz Narup oqarpoq.

Aamma atuaruk Visit Greenland: Asfalti takornariat pilerigisarinngilaat

Aamma atuaruk Kangerlussuaq ataannassanersoq isumaliuutigaat