Visit Greenland: Asfalti takornariat pilerigisarinngilaat
Ilulissani aamma Nuummi mittarfiit talligutsigik, takornariat takkussuutilissapput. Taama oqartoqarajuttarpoq, tamannali Visit Greenlandip pisortaata isumaqatiginngilaa.
Attaveqaqatigiinnermut atortulersuutit kisimik naammanngillat
- Asfalti immineerluni takornarianit ornigineqarneq ajorpoq. Tassami angalanissamut pissutissaqartariaqarpoq. Ataqatigiinnermut atortulersuutit pitsaanerulersinnissaat pingaartorujussuuvoq, tamanna isumaqatigiissutigisinnaavarput, mittaarfiilli immineerlutik pilerinartuunngillat.
Visit Greenlandimi pisortaq Anders Stenbakken taama oqarpoq.
Taassuma nassuiaatigaa tamanna immini ajornartorsiutaanngitsoq, aammali pingaaruteqarluinnartut tassaammata ussassaarineq, piseqqusaarineq aamma angalatitsivinnik attaveqarneq.
Aamma atuaruk 725 millionit ukiualunni mittarfeqarnissaq qulakkiissavaat
- Piseqqusaarinermut atatillugu mittarfittaarnissaq utaqqisariaqanngilaq, tamannami utaqqisinniaraanni piffissaq aatsaat sivitsorpat mittarfeqartoq ilisimaneqalissaaq. Mittarfiliortinnanimi tamanna allartinneqareertariaqarpoq
Oqaluttuarisaaneq ilinniarfigalugu
Stenbakken takornariartitsinermut atatillugu isumaqarpoq, Kalaallit Nunaanni aallaqqaammut mittarfiit pingaartinneqarpallaartariaqanngitsut. Periarfissammi pioreersut atorluarneqartariaqarput, Kalaallit Nunaatalu angallavigineqarsinnaasutut isigineqarnera nukittorsarlugu.
Aamma atuaruk Kangerlussuaq ataannassanersoq isumaliuutigaat
Aamma atuaruk Mittarfiit nunarput ataatsimoortissavaat
Aarlerigineqarsinnaammammi, mittarfinnik akisoorsuarnik sanaartornerup kingorna takornarianik takkuttoqarneq ajulernera. Tamannami Paamiuni, Aasianni Qaanaamilu mittarfiliortoqarnerata kingorna misigereeratsigu.
- Uanga aningaasaaterpassuaqartuuguma mittarfiliornissanullu aningaasaliisuuniarlunga, tunitsivigineqarsinnaasut amerliartornerat takorussagaluarpara. Takornariat amerlanerulernissaat aamma takorusussagaluarpara. Taamaattumik soqutigissagaluarpakka aningaasarsiorfissamik tamatuminnga soqutiginnittut siunertaqarlutik sulinissaat, tassa tikinneqarsinnaasoq takoqqusaarutigalugu tuniniakkallu ineriartortillugit, piserusuttunummi nutaanut naleqquttuusussaammata. Pisisartummi assigiinngitsorpassuarnik piumasaqartarmata.
