725 millionit ukiualunni mittarfeqarnissaq qulakkiissavaat
Attaveqaqatigiinnermut angallannermullu naalakkersuisup innersuussinissani tunuarsimaarfigaa, erseqqissarluguli Kangerlussuup mittarfia suliarineqaqqissappat, aaqqiineq sivikitsuinnarmik atuutissasoq.
Iluarsaassineq akisuvoq
Iluarsaassineq 725 millionit koruunit missaanik akeqassangatinneqarpoq, iluarsaassinerulli malunniutai sivisungaassanngillat.
- Kangerlussuaq aserfallatsaalisariaqarparput 725 millionit koruunit missaanik akeqartumik, ukiullu qulit 15-illu annerpaamik atasinnaassaaq, angallannermut attaveqaqatigiinnermullu naalakkersuisoq Knud Kristiansen oqarpoq.
Aamma atuaruk Mittarfiit nunarput ataatsimoortissavaat
Taassuma tikkuarpaa Kangerlussuup mittarfia takisuujusoq, aammalu nuna sananeqarfia unammillernartortaqartoq. Tassami miffissiaq nunami qeriuaannartumi sanaajuvoq, taammammallu maniilleqqajaaqimmat akuttunngitsumik iluarsaanneqartariaqartoq.
- Atlantiku avannaani mittarfeqarnissaq toqqarutsigu, isumaqarpoq aamma pinngitsoorata Kangerlussuaq nutarsartariaqaripput aserfallatsaalisariaqarippullu, Knud Kristiansen oqarpoq.
Talliliineq milliardinik naleqartoq
Atlantikumik qulaassisartunut Nuummi Ilulissanilu 1799 meterinik takitigisunik mittarfiliortoqassappat qanoq naleqassanersoq Naalakkersuisoqarfik kisitsileruttorpoq, Knud Kristiansenilu missiliutaannarnnik maanna oqaarsinnaavoq.
Aamma atuaruk Kangerlussuaq ataannassanersoq isumaliuutigaat
- Tassa uani oqarpugut missiliorlugu milliardit missaaniissasut, kisianni annerusinnaavoq aamma minnerusinnaalluni taamaammat kisitsisinut tunngasut maanna qulaajarlugit aallartippagut.
Atlantikup avannaanik qulaassisartunut 1199 meterinik Nuummi Ilulissanilu mittarfiliortoqassappat, taava imaaliallaannaq tallisaasoqarsinnaasoq, Knud Kristiansenip erseqqissarpaa. Tallisaanissarlumi ukialuit qaangiuppata pisariaqalersinnaareerpoq.
- Tikittarfiit illorsuit Nuummi Ilulissanilu naapertuuttunngorsareerlugit piareersassavagut, tassa imaappoq ukiuni qanittumi talliniisoqaqqikkaluarpat piareersimariissapput atortuutaalu, attaveqaqatigiinnermut angallannermullu naalakkersuisoq oqarpoq.
