Suliniut Newport Siumumit ilalerneqanngilaq
Siumumi siulersuisuunerit suliniut Newport juulip ulluisa 31-anni ataatsimiinnermi ilaatigut eqqartorpaat, naallu Nunatta ineriartornera mittarfiliortitsinikkut ilaatigut ineriartortinneqarniaraluartoq, Ilulissat kisimik avataaniit isaavittut atorneqalernissaa, Siumumi siulersuisuunerit isumaqatiginartinneqanngilaq.
- Nunatta sinnerani innuttaasut aamma angallannikkut kiffartuunneqarnissaat eqqarsaatigineqartariaqarpoq, minnerunngitsumillu Kangerlussuarmi inuit 500-t sinneqartut najugaqartut, Jørgen Wæver Johansen oqarpoq.
AAMMA ATUARUK Qaasuitsup kisimiiilluni suliniutaa nunatta sinneranut sunniuteqarsinnaasoq
AAMMA ATUARUK Newport pillugu nalunaarusiaq: Nalorninaateqarfiusinnaasut nalilersorneqartariaqarput
Suliniutip Newportip amigartooruteqarluni ingerlalissagaluarpat tamanna Nunatta karsianit matussuserneqarsinnaanissaanut suliniummi naatsorsuutigineqarnera Siumup siulersuisuunerinit aamma isumaqatigineqanngilaq.
Avataanit aningaasalersueqataatinniarneqartut erniatigut qulakkiikkamik pissarseqataasarnissaannik aaqqissuussinissamik siunnerfeqarneq Siumumi siulersuisuunernit aamma isumaqatigineqanngilaq.
Tassa suliniut Newport Siumumit ataatsimut isigalugu ilalerneqanngilaq.