Navalnyjip arnaa illersuisualu siberiami paarnaarussivimmut aallarput
![](/sites/default/files/styles/image_934x467/public/2024-02/20240217-142639-L-5500x3668ma.jpg?itok=AEzrMVIE)
Maannakkut nunani allani pisunut ingerlaqqippugut,
Aleksej Navalnyjip arnaa, Ljudmila Navalnaja, arfininngormat sumiiffimmut Seberiap ilaaniittumut aallarpoq, tikitaa tassaavoq pillakkanut inissiisarfik IK-3mik taaneqartartup sumiiffia.
Putinimut isornartorsiuisoq tassani toqusimasoq nalunaarutigineqarpoq.
Novaya Gazeta nutaarsiassiivik taama allaaserinnippoq.
Ljudmila Navalnaja Aleksej Navalnyjip illersuisua peqatigalugu, pillakkanut inissiiviusartumut aallarpoq.
Pillakkanut inissiisarfimmi ataasinngormat ernini pulaaramiuk, peqqittoq ajunngittorlu Navalnyjip arnaa taama nassuiaasimavoq.
-Misiginneqataanermut tunngasunik tusarusunngilanga. Ataasinngornermi februaarip ulluisa aqqaneq-aappanni pillakkanut inissiivimmi takuarput. Peqqittoq, nuannaartoq uumasorlu takuarput, taama Ljudmila Novaya Gazetamut oqarpoq.
-Illersuisoq Ivan Zjdanov paarnaarussiviliarpoq, Navalnyjip sulisuini oqaaseqartartoq Kira Jarmysj taama oqarpoq.
Navalnyj 47-unik ukiulik toqusimasoq, Kira uppernarsaavoq. Ilanngullugulu toqusup arnaata, ernermi toqusimaneranut pappilissatigut uppernasaammik tunineqarsimasoq oqaatigivaa.
Toqusup putinimut isornartorsiuisup timaa suli tigusimanangu, toqusut inaanni Salekhardimi sulisoq oqarpoq.
Navlanyjip arnaata Navalnyjillu illersuisuata, toqusut inaat arfininngormat alakkarpaat, kisiannili uppernarsarsinnaavaat suli timaa apuunneqarsimanngitsoq.
Paarnaarussivimmi sulisut oqartussat nalunaarutigivaat, Navalnyji tallimanngormat toqusimasoq. Pisuttuartitsinermi napparsimalersimavoq ilisimajunnaarlunilu uppissisoq oqaatigineqarpoq, ikiueqqaarnermi uummarsarneqarsimangaluarpoq iluatsinngittumilli.
Navalnyji pillakkanut inissiivimmut "Issittup amarua"-nik taaneqartartumut, 2023-imi decemberip qaammataani paarnaarunneqarpoq.
Nunani assigiinngitsuni aqutsisut Kremlinimut tikuuaapput, oqaariartuutigineqarporlu Navalnyjip toquneranut Kremlinimit pisooqataasut.
Navalnyj Ruslandimi taamani præsidentimut, Vladimir Putinimut, isornartorsiuisuni nuimanersaasoq toqunartutortinneqarluni 2020-mi aggustimi toqoriaraluarneqarpoq.
Tysklandimi kingorna katsorsarneqarpoq, tassanngaanniillu Ruslandimut uterluni tikikkami tigusaavoq parnaarussaallunilu.
Navalnyj Ruslandip qiterpasissuani maannamut parnaarussaaqqavoq.
Navalnyj-p suna toqqutigineraa Kremlimit nalunaarutigineqanngilaq, Putinili ilisimatinneqareersoq oqaatigineqarluni.
Putinimik isorinnittoq præsidentimut qinersinissamut sassartitaaqqusaanikuunngilaq.