Nunat ikuallattut amerleriartut

Aasaq manna nunarput kiannerpaajunngikkaluartoq nunani allani kiassiornerup kinguneranik nuna panerluinnarsimapput. Danmarkimi Sverigemilu nunat ikuallapput, Skandinaviamiinnaanngitsorli kiarujussuarpoq. Nunarsuummi sinnerani tamanna ajornartorsiutigineqarpoq.
Assi © : DVIDSHUB / Flickr
Allattoq Ritzau
juulip 29-at 2018 13:54

Silap pissusiata allanngoriartornera pissutaaqataasoq Financial Timesip allaaseraa, taannaannaanngitsorli DR-imi nutaarsiassaqartitsiviup oqaatigaa. Upalungaarsimanermi pingaaruteqarnerarpaat.

Nunap panernerujussuata kinguneranik ikuallattoqartarnera nunani arlalinni nalaarneqarpoq. Grækenlandimi, Sverigemi, Californiami siornalu Portugalimi. Europami nunat ikuallaffiit ukioq manna 450-init ikinnerunngitsut 30 hektarit sinnerlugit isorartussuseqarput. Ukiuni kingullerni qulini procentit 40-t sinnerlugit annerunerullutik. Amerikami nunanik ikuallattoornerit orpippassuarnik ikuallattoornerujussuit 1970-ikkunnit marloriaatinngorsimapput, taakkuali qamisaanissamut misilittagaqarnerupput.

Portugalimi siorna nunamik ikuallattoornerujussuup upalungaarsimaneq pitsaanngissusaanik allaaveqarsinnaanera immikkut ilisimasallit assortorusunngilaat. Ikuallattoqarnerani inuit 100-t ikinnerunngitsut ajunaarput, ukioq mannalu Grækenlandimi ikuallattoqarnerani 87-it ajunaarlutik. Grækenlandimi naalakkersuisut siulittaasuat Alexis Tsiprasip nunap ikuallarujussuarnera politikkikkut akisussaaffigineqarnerarlugu tallimanngormat oqaatigaa.

AAMMA ATUARUK Nassuttuumi Amitsorsuarmilu angallattoqannginnissaa kajumissaarutigineqarpoq

AAMMA ATUARUK Nassuttuumi ikuallanneq annikillineqartoq

- Akisussaaffimmit qimaaniarsarinngilanga, Tsipras oqarpoq.

Ikuallattup qamisarniarneqarnera arriippallaamik pisimanerarlugu græskit oqartussaasui isornartorsiorneqarput. Upalungaarsimanermi atorfillit, soorlu qatserisartut, aningaasaqarniarnikkut ajornartoorfimmi ikilisaaffigineqarsimanerannit Grækenlandi suli sunnerneqaqqavoq. Ikuallarujussuartoqassanngippallu sulisut pingaaruteqartorujussuupput.

Californiami Australiamilu orpippassuit ikuallattarnerannut qaminniaasarnermik misilittagaqarluartoqarpoq. Ikuallattoqalermallu, ilimagisamit annertunerujussuugaluamik piareersimalluartoqarmat ajornartorsiutigineqanngilaq.

Nunatsinni aamma siorna nuna ikuallappoq. Nassuttuumi Aasiaallu kujataatungaani nuna sapaatip akunneri marluk angullugit ikuallalluni.

AAMMA ATUARUK Nassuttuumi nuna ikuallattoq

 

Nutaarsiassami kukkunermik nassaarsimaguit uunga allaffigineqarsinnaavugut.

Aamma atuaruk