Nassuttuumi nuna ikuallattoq

Attup kangiani, Nassuttuumi nunami ikuallattoqarnera pillugu Qaasuitsup Kommuniata annaassiniartartutut upalungaarsimatitaanut ippassaani kalerriutigineqarpoq.
Nunap ikuallannerata timmisartumit assilinera Assi © : Qaasuitsup Kommunia
Allattoq Simon Uldum -
aggustip 02-at 2017 04:59

Ilulissani politiit, Qaasuitsup Kommuniata annaassiniartartutut upalungaarsimatitai aamma Qaasuitsup Kommuniata ikuallanneq qanimut malinnaavigaat, Air Greenlandillu timmisartuisa nunamik qulaannittut ingerlaavartumik assiliisassapput, Qaasuitsup Kommunia tusagassiorfinnut nalunaaruteqarluni taama allappoq.

Politiit pigaartoqarfiat piniartunit arlalinnit nunap immikkoortuani pineqartumiittunit ikuallattoqarnera pillugu ilisimatinneqarsimavoq.

- Nunami immikkoortumi piniartunit ilisimatitsissutinik suli tigusaqartarumavugut, politiit ilisimatitsippurt.

Ilulissani politiinut oqarasuaatikkut 701448-mut attavigineqarsinnaapput, aamma ikuallattoqarneranik assilisanik mailikkut uunga GRL-Ilulissat@politi.dk nassiussisoqarsinnaavoq.

 

 

Aasaanerata sialoqarpiannginneratigut nunami ikuallattoqalersinnaavoq. Taamaattumik sikarettinik pujortarnermi aamma ikumaartitsinermi innuttaasut immikkut ittumik mianersortarnissaannik qinnuigineqarput, kommuni taama allappoq.