Assi: Qaasuitsup Kommunia

Nassuttuumi Amitsorsuarmilu angallattoqannginnissaa kajumissaarutigineqarpoq

Nassuttuumi nunap ilarujussuata ikuallannera pissutaalluni Nassuttuumi Amitsorsuarmilu angallattoqannginnissaa, nunami pisuttuarneq piniarnerlu taakkununnga ilaallutik, Kalaallit Nunaanni Politimestereqarfiup nalunaarutigaa.

Nassuttummi nuna 5-15 kvadratkilometerisut annertutigisoq ikuallappoq. Ikuallanneq 2 kilometeritut qutsitsigisumut pujuliortitsivoq, pujorlu kilometerinut hunnorujulikkaanut siaruaakkiartortoq nalunaarutigineqarpoq.

Amitsorsuup nalaani nuna 800 x 800 kvadratmeterit missaannik annertutigisoq ikuallappoq, tamaanilu aamma pujuliortitsilluni.

Taama pujuliortitsisoqarnera pissutaalluni angalasut sammiveeruttoorsinnaasut, Politimestereqarfiup aarlerisaarutigaa.

Nassuttuumi Amitsorsuarmilu nunat ulluni tulliuttuni suli ikuallattuarallarnissaat ilimagineqarpoq.

Oqartussat pisut malinaavigaat.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl