Nassuitsumik asaqatigiinneq kulturikkut nersornaasiinermi ersertoq
Inuiattut ullorsiornitsinni kulturikkut pisarneq malillugu nersornaasiisoqarpoq.
Siornatigut inunnut ataasiakkaanut suliniaqatigiiffinnulluunniit nersornaasiisoqartarpoq. Kulturikkullu ukioq manna nersornaat aappaariinnut siullermeersumik tunniunneqarpoq.
- Liv Aurora Jensen, qutsavigaakkit nunatsinni ilusilersuinermik annertuumik suliaqarnerit pillugu, ilaquttatit ilanngullugit pilluaqquakkit. Peter Jensen, aamma illit qutsavigaakkit filmiliornerup silarsuaani annertuumik suliaqarnerit pillugu, ilaquttatit ilanngullugit pilluaqquakkit.
Kulturimut nersornaat aappariinnut Liv Aurora Jensenimut aamma Peter Jensenimut tunniukamiuk, kultureqarnermut naalakkersuisoq Aqqaluaq B. Egede taama oqarpoq. Liv Aurora Jensenip uinilu Peter Jensenip Aqqaluaq B. Egede oqalugiartoq attortisimaqalutik saarlerni issiallutik tusarnaarpaat.
Nersornaat tunniunneqareermat Liv Aurora Jensen attortisimaqaluni oqaluttarfimmut oqalugiarpoq nersornaaserneqarnertik pillugu qujassuteqarluni:
- Ataqqinartut isersimasut, asasara naalakkersuisoq, asasara Kalaallit Nunaat, inuiattut ullorsiornitsinni pilluaritsi. Siullermik qamannga pisumik qujavunga. Nunatta kulturikkut nersornaasiuttagaanik tunineqarnera tulluusimaarutigeqalugulu maniguussutigaara, Liv Aurora Jensen oqarpoq nangillunilu:
- Nersornaaserneqarnissarput pillugu sapaatit akunneri pingasut matuma siorna sianerfigineqarama isumalioqqaaraluarpunga asuleertoqartoq.
Nersornaat aappariinnut siullermeersumik tunniunneqartoq
Kisianni tassa ilumoorpoq. Liv Aurora Jensenili kisimi nersornaatisinngilaq, kulturikkummi nersornaasiuttagaq aappariinnut siullermeersumik tunniunneqarpoq.
Liv Aurora Jensenimmi uia ukiorpassuarni filmiliortartoq, Peter Jensen, aamma nersornaaserneqarpoq.
Suliatik pillugit aatsaat nersornaaserneqarnatik aatsaalli taama pikkunartigisumik nersornaaserneqarlutik, Peter Jensen KNR-imut nersornaaserneqareerlutik oqarpoq:
- Pikkunaqaaq. Aatsaat taama pikkunartigisumik. Siornatigut nersornaaserneqartaraluarpugut, kisianni una pikkunarnerpaagunarpoq.
Ukiorpassuit Danmarkimeereerluni nunatsinnut 1987-imi uterami kalaallisut oqalunneq puigorsimallugu kalaalllisullu isaasalerlugu nipini eqqumiitsuliortarnermigut nassaareqqissimallugu, Liv Aurora Jensen nersornaaserneqareerlutik oqalugiarami oqarpoq:
- Nutaanik ilusilersuisarnikkut kinaassutsinnut ilisarnaataapput, taanna oqarpoq.
Asaqatigiinneq eqqumiitsuliornerlu
Kalaallisulli isaasalerlugu nipini eqqumiitsuliortarnermigut nassaareqqiinnarnagu misigaaq tusaaneqarluni takuneqarlunilu.
Liv Aurora Jensenimmi uini Peter Jensen naapikkamiuk, inuunera nutaaq aallartippoq.
- Uiga naapikkakku inuuninni immikkoortoq nutaarluinnaq aallartippoq. Takuarma. Ilusilersuisartuunera takuat, ilusilersuisinnaanissannut piumasaqaatitaqanngitsumik kiffaanngissuseqartipparma, taanna oqarpoq nangillunilu:
- Illeqanngitsuuppat uannullu tatiginnittuarnerit, asannittuarnerit tapersersuiuarnerillu pisimanngitsuuppata ullumi maani nikorfanavianngikkaluarpunga, Liv Aurora Jensen oqarpoq.
