Arsarnerit ataanni nuersaaneq: Kalaalerpaluttut Livip atuakkiamini nutaaliarigai
Ilusilersuisartup Liv Aurora Jensenip angerlasimaffimmi kiileriani pisiniarfiutaa ilulisersukkaminillu tuniniaasarfia ateqarpoq Inuk Design. Tamaani qilaami pappilissat qiortakkat nivingapput, iikkami plakatit ilutsillu nerrivinni ipput. Tamakku tamarmik nunatsinni pinngortitamit kulturitsinniillu aallaaveqarput. Aammali atuagaq nutaartatut siumugassaavoq. Taanna ateqarpoq Strik under Nordlys, isumaqarlunilu arsarnerit ataanni nuersaaneq. Ilusilersuisartorlu nuersaanermut tunngasumik siullermeerluni saqqummersitsivoq.
Taassuma atuagaq tiguaa qupperlugulu.
- Tujuulussuarnik kalaalerpaluttuliornermut ilanngusserusuppunga. Tassa tujuulussuup Kalaallit Nunaanneersuunera takulluarneqarsinnaassaaq, pissutigalugu allai nunani allani takuneqarpiarnikuunngimmata, taanna oqarpoq.
Taannaavoq Liv Aurora Jensenip ilusilersuisarnermini ataatsimut isigalugu takutikkusutaa. Pisisussaq qularuteqassanngilaq. Taannalumi aamma uimi nuersaanermut tunngasunik suliaqaqqulluni siunnersormani qularsimanngilaq.
Coronap nalaani
Corona tuniluutipiluulermat suliffeqarfippassuit allat assigalugit pisiniarfik Inuk Design aamma matusariaqarpoq. Pisoq kiilerimi pisiniarfeeqqamut imaannaanngilaq, Liv Aurora Jensenimulli nutaamik eqqarsalersitsivoq.
Taassumami uini nutaanik isumassarsioqatigaa.
- Kikkut tamarmik nuersaanermik nuannarisaqalersimasut malugaara. Nuersaaneq torragineqanngittarnikooqaaq, arnammi utoqqaat kisimik nuersaasarmata. Kalaalerpaluttunilli nuersaanermut tunngasumik atuakkiussasunga uima siunnersorpaanga, taanna oqaluttuarpoq.
Isumassarsereeramilu iliuuseqapallappoq, kalaallillu nuersagaat pillugit paasiniaanermini nuersaanermut tunngasunik paasissutissaqarpiannginnera tupaallaatigaa.
- Gudrun Chemnitz 1990-kkut ingerlaneranni nuersaaneq pillugu atuakkiormalli najoqqutassanik iluamik atuakkiortoqaqqinnikuunngitsoq paasivara. Taava eqqarsarpunga – aha! Immaqami nuersaanermut tunngasumik atuakkiortuugaanni. Taannalu maanna aana, Liv Aurora Jensen oqaluttuarpoq.
Suliangaatsiaq
Naak Liv Aurora Jensen nuersaanermik nuannarisaqaraluarluni pikkorinnerpaaffiginngisaminik aallartitsinini unammillernartissimavaa, ukiunilu marlunni atuakkiorpoq.
- Atuakkiorninni suna tamarmi ilimagisattuinnaq pinngilaq. Nuersaaneq pillugu taama sivisutigisumik atuakkiornissara takorluunngikkaluarpara.
Lis Aurora Jensenip ilusilersukkami najoqqutassartai atuakkiarai. Islandimiut norskillu tujuulussualioriaasaat isumassarsiorfigisimavai.
- Islandimiut tujuulussualioraangamik sukangasorujussuusartoq isumaqarpunga, norskillu nerutunerusumik tujuulussualioriaaseqarput. Uanga tujuulussualiakka sukangavallaartikkusunnagillu nerutuallaartikkusunngilakka. Taamaalillunga isumassarsiorninni taakku marluk tujuulussualioriaatsit naapisinniarsaraakka. Taamaammat sulinera kisitsinertalerujussuuvoq, taanna illarpoq nangillunilu:
- Uigami aperiinnaruk kisitsininni naluleraangama qasseriarlunga oqaasipilussimanersunga.
Taannami kalaalerpaluttunik torrallaqqissaakkanik immikuullarilluinnartunillu tujuulussualiorusussimavoq.
Isumassarsiorneq
Suliat atuakkap qulequtaata oqaatigai; Strik under Nordlys, tassa arsarnerit ataanni nuersaaneq. Issittumi pinngortitaq kalaallillu kulturiat nuersaanermut nuutinneqarpoq.
Lis Aurora Jensenip sakissani tikkuarpaa, tassami meqqut eqimattaaqqat assigiinngitsunik qalipaatillit tujuulussaanut nuersaanneqarsimapput.
- Kalaallisuutta nuilarmiortai isumassarsiorfigaakka. Taamaaliorpunga kinaassuseq ilisarsinerlu takutikkusullugit, taanna oqarpoq.
Pisarneq malillugu suliaasartut nutaaliaralugit suliarineqarput. Ilulisilersuisarnerminilu pissusissamisuuginnartutut isigaa.
- Nutaanik pilersitsiniartillunga eqqarsaraangama sunaluunniit eqqarsaatinnut annguttoq ammaffigisarpara. Issiarujoorlunga nuersaatillunga suna nuersarnerlugu nalupajaartarpara. Titartaagaangamattaaq soorlu aqerluusap assaga ingerlatiinnartaraa, taanna nassuiaavoq.
Taamaattumik nuersaanissamut najoqqutassiai atuakkamiittut maleqqissaarneqartariaqanngillat. Atuakkamimmi pisisussat najoqqutassianut pituttorsimavallaaratik alapernaassasut Liv Aurora Jensenip kaammattorpai.
- Nuersaaninni nammineq nutaanik misilittaagit, taanna oqarpoq.
Atuagaq Strik under Nordlys Inuk Designip pisiniarfiani pisiarisinnaavat.