Narsami pisoq pillugu eqqartuussivimmi suliaq illersuisumut unnerluussisussaatitaasumullu misigissutsitigut sunniisoq
Narsami siorna marsip 22-ani aallaasersortoqarnera pillugu eqqartuussut nunatsinni nalunaaqutaq ullaaq arfineq-marlunngortoq nalunaarutigineqarpoq.
Unnerluutigineqartup 21-nik ukiullip Danmarkimi tarnikkut napparsimmavimmut piffissami killiligaanngitsumi inissinneqarnissaa eqqartuussutigineqarpoq.
Eqqartuussut 21-nik ukiullip illersuisuatalu unillatsiarnerup kingorna akueraat. Tamanna qanoq eqqartuussuteqartoqarsinnaagaluarnerata nalilernerata kingorna pivoq, Christina Johnsen KNR-imut oqarpoq.
- Piffissami aalajangersimasumi pineqaatissinneqarsimasunut inissiisarfimmiittussanngortinneqaraluaruni, assersuutigalugu Nuummi taava pisariaqartitaminik ikiorneqarnavianngilaq, taanna oqarpoq.
- Aamma pisariaqartitaanik nunatsinni tarnikkut nappaatinik katsorsaanissamut maanna periarfissaqanngimmat eqqartuussut akueraarput.
Unnerluussisussaatitaasut piffissami killiligaanngitsumi pineqaatissiisoqarnissaa akuereqqammerluinnarpaat. Taamaammat unnerluussisussaatitaasup, Martin Strandbyp eqqartuussut naammagisimaarpaa.
- Eqqartuussiviup pissutsinit unnerluussissutigisatsinnit 28-nit 27-nut eqqartuuppaa. Taamaammat eqqartuussut naammagisimaarluinnarpara.
Pissusilersuutigisimasamisut taakkartukkani ataasinnguaq kisiat unnerluutigineqartup ilaatigut kisimi nassuerutigaa, tassa qoorortuumik tillinnermut tunngasoq.
Suliaq Eqqartuussisoqarfik Kujallermik suliarineqarpoq, taamaakkaluartorli tamanna Aarhusip Eqqartuussiviani inimi eqqartuussivimmi ulluni arlalinni pilluni, tamanna maanna pineqaatissinneqartup Aarhus Universitetshospitalip Tarnikkut napparsimasunut immikkoortortaqarfiani R3-mi tigummigallarneqarneranik pissuteqarpoq.
Eqqartuussivimmi suliaq suliarineqarnissaata Danmarkimut nuutsinneqarnissaa eqqartuussisut, unnerluussisussaatitaasup, illersuisullu akornanni isumaqatigiinnikkut aalajangerneqarpoq. Tamanna 21-nik ukiullip tarnikkut qanoq inissisimaneranik eqqarsaatiginninnermik pissuteqarpoq, aammali sila pissutigalugu assersuutigalugu Narsarsuarmit aallanngitsoortariaqassagunik parnaarussiveqarniarnissaa ajornakusuussammat taama aalajangiisoqartariaqarsimavoq.
Ilisimannittut nassuiaateqarneranit sunnertisimasut
Martin Strandbyp aamma Christina Johnsenip suliaq – arlalinnik pissuteqartumik – immikkut ittuunerarpaat.
Nunatsinni aallaasersungaatsiarnerit qujanartumik qaqutigoortuupput. Naallu pisumi toqusoqanngikkaluartoq tamanna tusagassiuutini inuiaqatigiillu ilaanni initungaatsiarpoq.
Tamanna – assersuutigalugu illumi nalaatsornerinnakkut seqqortaarfigineqartumi isersimasimasut, qulimiguulimmiittut heliportillu eqqaaniittut ilisimannittutut nassuiaateqarneratigut malugineqarsinnaasoq, unnerluussisussaatitaasoq, Martin Strandby oqarpoq.
- Suliami ilaalluni ilisimannittullu nassuiaateqarneratigut misigalugu taakkulu ersisimanerat annilaarsimanerallu tusarlugit sakkortuvoq, taanna oqarpoq.
Taassuma suliap maanna naammassineqarnera nuannaarutigaa. Aamma pinerlineqarsimasut Narsamilu inuiaqatigiit pillugit.
Sumiginnarneqarsimanermut oqaluttuamit sunnertisimasoq
Suliarli assigiinngitsutigut aamma unammillernarsimasoq, Christina Johnsen oqarpoq.
- Suliaq assigiinngitsorpassuartigut pissanganarluinnarpoq, kisianni aamma unammillernarpoq. Aamma ilumoorlunga nassuerutigissavara illersukkama peroriartornera tusaraangakku tamanna misigissutsitigut unammillernartingaatsiarsimagakku.
21-nik ukiullip meeraaneranit oqaluttuani imigassaq, nakuuserneq, imminut toqoriarneq kaannerlu initusimapput.
Tamatuma saniatigut ukiorpassuarni tarnikkut napparsimanini qanittumi aatsaat suussusilerneqartoq unammillissutigingaatsiarsimavaa. Tamanna eqqartuussinerup ingerlanerani saqqummiunneqarpoq.
Illersuisup, Christina Johnsenip eqqartuunneqartup peroriartornera iliuuserisaanut qanoq sunniuteqartigisimanersut inerniliiffigerusunngilaa, oqarporli:
- Soorlu suliami matumani isumaginninnermut tunngasuni, peroriartornerani nuuttaarneranilu suut tamarmik ajutoorsimasutut ipput.
- Isumaqarluinnarpunga sinaakkutinik pitsaanerusunik pilersitsinissamut qanoq pitsaanerulersitsisinnaalerluta arlaatigut misissortariaqaripput inunnullu eqimattanut ilungersorluinnartunut neriuuteqalersitsilluta.
Martin Strandby pinerluuteqartup peroriartorneranik oqaluttuamik aamma sunnertinngitsuunngilaq.
- Maanna naammassivarput. Maannalu pisariaqartitaminik ikiorneqaqqunarpoq, taanna oqarpoq.