Narsami aallaasersornermi unnerluutigineqartoq ukiorpassuarni ikiortissarsiortarsimasoq
NAQQIUT: Unnerluunneqartup peroriartornera pillugu unnerluussisussaatitaasup Kommune Kujallermit oqaaseqaammik pisimanera, allaaserisami siullermi ilaavoq. Oqaaseqaalli Kommuneqarfik Sermersuumeersuuvoq, allaaserisarlu una naqqitaalluni. Kukkuneq KNR-imiit ajuusaarutigaarput.
- We blame society, but we are society – imaluunniit kalaallisut: Inuiaqatigiit pisuutippagut, kisianni uagut inuiaqatigiiuvugut.
Narsami pisimasoq pillugu suliami illersuisup, Christina Johnsenip eqqartuussivimmi ullumi ingerlatsinermini aallarniivoq.
Narsami siorna marsip 22-ani aallaasersornermi inunnik 14-inik toqutseriarsimasutut nakuusernerillu allat pillugit angut 21-nik ukiulik unnerluutigineqarpoq.
Naallu taassuma pisimasut tamangajammik nassuerutigereeraluarai pisimasut tamarmik unnerluutigineqartoq piffissaagallartillugu ikiorneqarsimasuuguni pinngitsoortinneqarsimasinnaassagunaraluartut Christina Johnsen eqqartuussivimmi oqarpoq.
- Sooq inuiaqatigiit inuusuttunut ikiorneqarnissamik pisariaqartitsisunut – aamma arlaleriarluni ikioqqusumut ikiuinissamut pikkorinnerusimanngillat, eqqarsaatissiissummik apeqqusiivoq.
Angajoqqaat politiini suliani 140-ini amerlanerusuni eqqaaneqartut
Angut inuusuttoq pinerluuteqarsimasunut siusinnerusukkut eqqartuunneqarsimanngilaq. Taarsiulluguli peroriartornermini sumiginnagaangaatsiarsimavoq, tigusarineqarnermilu kingorna aatsaat tarnikkut napparsimanera paasineqarsimalluni.
Inuunerani pissutsit eqqartuussivimmi eqqartorneqarnerani angajoqqaani qatanngutinilu arfinillit peroriartorfigisimagai taamaakkaluartorli takunngitsuusaarneqartutut misigiuaannarsimasoq oqaatigineqarpoq.
Atualeqqaaramili pimmatigineqartarsimasoq meeqqallu atuarfiat 9. klassip aallartinnerani unitsissimavaa, kingornalu sunissaanut malittareqqinneqarani.
Politiit unnerluutigineqartup arnaanut tunngatillugu 67-inik nalunaarsugaateqarput angutaanullu tunngatillugu 76-it. Taakku illumi sanilerisanit nakuusertoqarneranit nipiliornernik ilaqarput.
Pisumi ataatsimi angut unnerluutigineqartoq pingasunik ukioqarluni qatanngutini angajulliit arfinilinnik ukioqartut ilagalugit anaanartik illoqarfimmi imertoq ersillutik qiiallutillu ujaarisimavaat. Ataataasorlu angerlarsimalluni.
16-inik ukioqartoq politiit ornigupput, tassani unnerluutigineqartoq angajoqqaami oqqannerat pissutigalugu imminut toqunnissamik siorasaaruteqarsimavoq. Ilaqutariinni allat arlallit imminut toqunnikuusimapput.
Imminut toqunnissamik siorasaaruteqarneq imminullu toqoriaraluarneq maanna 21-nik ukiullip ukiut tulliini arlaleriarluni aqqusaarsimavai.
Tamatuma saniatigut angerlarsimaffimmi nakuusernerit, erngunnerit imerillu pillugit nalunaarutit arlaqarput.
Kommuneqarfik Sermersuumili isumaginnittoqarfik unnerluutigineqartup peroriartorneranut atatillugu paasissutissaaterpassuaqaratik oqartussanut paasissutissiissutigaat. Meeraanerminili sumiginnagaasimallunilu imerfiusimasoq aamma angajoqqaat isumaginninnissamut piginnaasaat pitsaanngitsut nalunaarsorneqarsimavoq.
- Politiit anaanaanut atatillugu 67-inik angutaanullu 76-inik nalunaarsuisimasut kommune paasissutissaateqarpiannginnerarnera eqqarsarnartoqartippara, Christina Johnsen oqarpoq.
Angut maanna 21-nik ukioqartoq 17-inik ukioqarluni kommunimut saaffiginnilluni allamut inissinneqarnissaminik piumasaqarpoq. Tamatumalu kingorna ilaqutarsianut assigiinngitsunut marlunnut inissinneqarluni.
Tigusarineqarnerata kingorna tarnikkut napparsimaneranut aatsaat katsorsarneqartoq
Politiit 21-nik ukiullip oqarasuaataanik misissuinerat naapertorlugu unnerluutigineqartup kinaassutsimik isertuussilluni oqarasuaatikkut siunnersuisarfiup ”Tusaannga”-p normua siorna marsip 22-ani aallaasersornissaminut akunnerit pingasuinnaat sioqqullugit ujarsimavaa. Unnerluutigineqartorli siunnersuisarfimmut sianersimanngilaq.
Unnerluutigineqartoq kamassimagaangami oqarasuaatikkut siunnersuisarfimmut sianernissamut siunnersorneqarnikuusimanersoq illersuisuminit toqqaannartumik aperineqarami ima akivoq:
- Qallunaatut oqaluttoqarnikuuvoq (Tusaanngami oqarasuaammik tigusisoq, aaqq.) taava oqaannarpunga 'nej'. Kamannginnissara pissutigalugu ikiorneqarniarsarisaraluarpunga.
Unnerluutigineqartoq kalaallisut oqaaseqartuuvoq.
Unnerluutigineqartup tarnikkut misissorneqarnerani nalinginnaasumik silassorissuseqartoq, ilaatigulli toqutsisutut misigisuusisarluni tarnikkut peruluttuusoq paasineqarpoq. Narsami aallaasersornermini aamma tarnikkut perulussimassasoq nalilerneqarpoq.
Tamatuma saniatigut katsorsarneqanngikkuni sakkortuumik pissusilersuuteqaqqinnissaanut aarlerinartoqangaatsiartoq nalilerneqarpoq.
Unnerluutigineqartoq tarnikkut nappaataanik aatsaat suussusiliisoqarpoq, tassunga maanna aamma nakorsaaserneqarluni. Tamanna pillugu Nuummi pineqaatissinneqarsimasunut inissiisarfimmi tigummigallarneqarnermini nakuuserninilu pingasuni peqataanermini nakorsaatitortinneqanngilaq.
Pisut taakku Nuummi Pineqaatissinneqarsimasunut inissiisarfiup 21-nik ukiullip tarnikkut atugaanut atatillugu isumaginninneratigut pinngitsoortinneqarsimasinnaagaluartut, Christina Johnsen eqqartuussivimmi oqarpoq.
- Isumaqarpunga pissutsit uku eqqortumik isumaginnittoqarneratigut pinngitsoortinneqarsinnaagaluartut.
Unnerluutigineqartoq tamatuma kingorna maanna inissinneqaqqaffigisaminut Aarhus Universitetshospitalip tarnikkut napparsimasunut immikkoortortaanut R3-mut nuutsinneqarpoq.
Unnerluutigineqartoq eqqartuussivimmi toqqaannartumik aperineqarami ima akivoq "ajunngilaq". Sumilu inissinneqaqqaguni pitsaanerpaassasorineraa aperineqarami ima akissuteqarpoq:
- Skejby (Aarhus Universitetshospital, aaqq) eqqissisimanarnerungaatsiarpoq. Kamarujussuarpallaartarunnaarpunga.
Sulisut tarnikkut nappaatinut ilisimasaqartut misigisimavit?
- Aap.
Kamannerit aqussinnaasutut nammineq misigisimavit?
- Aap, maannakkut aqussinnaallugu misigisimavunga.
Narsami aallaasersorneq Field'simi aallaasersornermut sanilliunneqartoq
Unnerluussisussaatitaasup, Martin Strandby Narsami marsip 22-ani pisoq Københavnimi pisiniarfissuarmi Field'simi 2022-mi aallaasersortoqarneranut sanilliuppaa.
Tassani angutip tarnikkut napparsimasup aallaasersornermini inuit pingasut toquppai inuillu arlallit ikilerlugit.
- Toqusoqannginnera nalaatsornikkut pisuinnaasoq uanga isigaara, unnerluussisussaatitaasoq, Martin Strandby Narsami aallaasersortoqarnera pillugu eqqartuussinermi oqarpoq.
Unnerluussisussaatitaasut angutip 21-nik ukiullip danskit tarnikkut napparsimmavianut piffissami killiligaanngitsumi inissinneqartussanngortinneqarnissaa piumasaraat. Tamatuma saniatigut aallaasersortoqarnerani pinerlinertunut taarsiissuteqartoqarnissaanut akiliuteqartoqarnissaanullu piumasaqaateqartoqarpoq.
Illersuisup Danmarkimi katsorsarneqarnissamik pineqaatissinneqarnissaanut piumasaqaat akerlilernagu tusaatissatut tiguaa. Taamaalilluni unnerluussisussaatitaasut isumaqatigalugit. Taannali ingerlatsinermini oqarpoq:
- Neriuppungali innuttaasugut pisariaqartitaannik katsorsarniarlugit 4000 kilometerinik ungasitsigisumut nassiuttariaqartarunnaassagigut neriuutigaara.
Tamatumalu saniatigut unnerluutigineqartup kilometererpassuarnik ungasitsigisumut katsorsartikkiartornissaa pinngitsoortinniarlugu peqqissusaa ukiualuit qaangiuppata misissorneqassasoq kaammattuuteqarpoq.
Eqqartuussivimmi suliami aqagu tallimanngornermi eqqartuussuteqartoqassaaq.