Nappartat arfineq pingasut imaaniittut
Nappartat tungujortut qaamasut dieselimik imaqartut qulit Ilulissat avannaatungaani 70 kilometerinik ungasissuseqartumi takornariartitsiviup World of Greenlandip akunnittarfimmik Glacier Lodge Eqi-mik piginniffigisaani iigartartumi Eqip eqqaaniittut malinnit nusunneqarsimassasut ilimagineqarpoq.
Air Greenland tusagassiuutinut nalunaarummi allappoq.
Nappartat marluk nassaarineqarsimapput, sinneri suli nassaarineqanngillat.
Nappartat puttasut apornissaat ulorianarsinnaammat sumiiffimmi imaatigut angallattut tamarmik mianersoqquneqarput.
Nappartat qulit Glacier Lodge Eqip eqqaanut imaatigut ataasinngormat apuunneqarput. Dieseli illuaqqani seqerngup nukinganik nukissiuutinut ilapittuutitut atorneqartarput.
Nappartat inissinneqarfigisartagaannut ajoraluartumik inissinneqanngillat nappartallu aqaguani inissinneqarfimminniinngillat. Nappartarlu ataaseq imaaniittoq takuneqarpoq.
Susoqarsimanersoq qangalu taama pisoqarsimanersoq ersarissumik oqaatigineqarsinnaanngilaq sermerli iigarsimassasoq mallillu nappartat imaanut nusussimassagai ilimagineqarpoq, Air Greenland tusagassiuutinut nalunaarummi allappoq.
Nappartat marluk qaqinneqartut
Ilulissani upalungaarsimasut - Air Grenlandimit qulimiguulimmik ikiorneqarlutik sumiiffimmi nappartanik pingasunngormat ujaasilerput.
Nappartat marluk nassaarineqarput sinneri arfineq pingasut nassaarineqanngillat.
Nappartat arfineq pingasut sinneruttut nassaarineqarsinnaasimanngillat, saagussaasimasinnaanerat kivisimaneralluunniit Air Greenlandimit nalunaarummi allassimavoq.
Pisoq avatangiisinut kinguneqarsinnaassanersoq suliamik ilisimasalinnit nalilersorneqarsinnaassasoq tusagassiuutinut nalunaarumminni aamma allapput.
Uuliamik annertunngitsumik aniasoqarsimaneranut ersiutissaqartoq annertunissaali piffissami matumani ilimagineqanngitsoq, tusagassiuutinut nalunaarummi allaaserineqarpoq.
Nappartat dieselimik katillugu 1600 literimik imaqarput, taakkulu piffissami aalajangerneqarsinnaanngitsumi uuliakoorsinnaanerat ernummatigineqarsinnaavoq.
World of Greenlandip pisoq naliliiffigaa, Glacier Lodge Eqimullu tulliani dieselimik pajuttoqarnissaanut sukaterilluni.
Sumiiffimmi nappartamik puttasumik imaluunniit immami uuliakoortoqarsimaneranik ersittoqarpat Avannaata Kommuniata avatangiisunut immikkoortortaqarfianut 38 76 14-imut imaluunniit World of Greenlandimut 94 43 00-imut sianeqqullugit tamat kaammattorneqarput.
