Napparsimmaviup nakorsaataasivianit nakorsaatinik tillinneq pineqaatissiinngikkallartumik eqqartuussuteqarnermik kinguneqartoq

Arnaq 37-nik ukiulik Tasiilami napparsimmaviup nakorsaataasivianit nakorsaatinik tillissimasutut ippassaq eqqartuunneqarpoq.

Taassuma nakorsaatit imminut atorniarlugit tillissimagai, Kalaallit Nunaanni Politiit KNR-imut paasissutissiipput.

Unnerluussut naapertorlugu arnap nakorsaataasivimmi nakorsaatilerisutut atorneqartup nakorsaatit katillugit 3.000 koruuninik naleqartut tillissimavai.

Tasiilami Eqqartuussisoqarfik Sermersuup arnaq pinerloqqissaguni ulluni 30-ni pinerluuteqarsimasunut inissiisarfimmiittussanngortinneqartussanngortillugu ippassaq eqqartuuppaa.

Tassa imaappoq arnaq ukiup ataatsip ingerlanerani pinerluuteqaqqissaguni ulluni 30-ni pineqaatissinneqarsimasunut inissiisarfimmiittussanngortinneqassaaq. Ukiup ataatsip ingerlanerani pinerluuteqaqqinngikkuni eqqartuussut atortussanngortinneqassanngilaq.

Tillinnerit 2021-mi novembarimit 2022-mut juulimut pisarsimapput. Unnerluussullu naapertorlugu morfinit 229-t, Ketoganit 35-nik annertussuseqartut, Kakcekstit 24-nik annertussuseqartut Fentanylinillu 48-nik annertussuseqartut tillinneqarsimapput.

Eqqartuussisullu tamanna pingaartuutippaa. Politiimmi oqarnerat naapertorlugu 37-nik ukiullip, napparsimmaviup nakorsaataasiviani atorfimmi tatigisaasumi sulisup nakorsaatit nakorsiaqqaarani imminut atorsimasai ”nakorsaataapput navianartut”, qaammatillu arfinilinnit arfineq-pingasunut sivisussuseqartup ingerlanerani tillittarsimavoq.

Arnaq tamatuma kingorna Danmarkimut nuussimavoq, taamaammat eqqartuussinermut Horsensip eqqartuussivianit videoliuutikkut peqataavoq.

- Kalaallit Nunaanni Politiit suliap naammassineqarnera ilorrisimaarutigaa, unnerluutigineqartormi unnerluussut naapertorlugu eqqartuunneqarpoq, politiit KNR-imut allapput.