Nannuttassiissutit aappaagumut amerlineqartut
Pinngortitaleriffiup kisitsineri nutaat malillugit nannuttarineqarsinnaasut 2017-imi 140-sut aappaagu 156-inut qaffanneqarsinnaasorai. Pisassiissutit avannaani kitaanilu 92-inut tunumi kujataanilu 64-inut agguarneqarput.
WWF-ilu pisassiissutit qaffattarnerannut pisarnermisulli ernumassuteqanngilaq. Pisassiissutimmi 90-ikkunniilli aatsaat kisitseqqissaarnermik tunngaveqarpoq, Nuummilu WWF-miit Kaare Winther Hansen naapertorlugu tamanna isumaqarluarpoq.
- Pisassiissutit piujuaannartitsisussat, aamma paasisakka malullugit silap allangoriartorneranik nannunut suniuteqaqisumik isiginnittunit, piginnaasaqarluartunit aalajangersarneqarput, Winther Hansen oqarpoq
Taamaammat nannut amerlinngikkaluartut, pisassiissutit nutaat paasissutissanik ilisimasanik aammalu Canadap nunattalu akornanni suleqatigiinnermit aalajangigaapput.
- Nannut Qeqertaaluup kangerliumarnganeersut, Kalaallit Nunaanni pisaqarfigineqartartuni pingaarnersaasut, pillugit piniarnerisa aqunnisaat Namminersorlutik Oqartussat Canadamik Nunavumillu suleqatigiissutiginissaat siullerpaamik iluatsippoq, WWF-imeersoq oqarpoq.
AAMMA ATUARUK Nanoq kaattoq nannunit ikiliartortuneersuusoq
Nannut amerlassusaat pasissuussuteqarnermit kisitsinerit nutaat naapertorlugit ajoquserneqarnavianngitsut, nannunillu ukiut 15-it qaangiuppata kisitseqqikkumaarlutik pisassiissutillu tamatumunnga naapertusarneqarumaartut Pinngortitaleriffiup erseqqissaatigaa.
WWF-illi isumaqatiginninnera tamaannga killeqarpoq.
- Piffissaq sivisuallaaqaaq, Kaare Winther Hansen erseqqissaavoq.
- Nannut ukiut 20-t matuma siornanit salunnerungaatsiarput. Nannut amerlassusaat silap allanngoriartorneranit piaqqiornikinnerulerlutik salunnerulerlutillu sunnerneqalereerput.
AAMMA ATUARUK Nassuttuumi nannut marluk takuneqarsimapput
Immap sikuata aannerani nannut nunamiinnerulissapput puisissinnaanatillu. Kaare Winther Hansenilu naapertorlugu tamanna takusimanngisatsinnik amerlassusaasa appariarneranik kinguneqassaaq.
- Sikup allanngoriartornera malinnaavigisinnaavarput, ilimagisatsitullu ingerlaannassappat ukiut 15-inngortinnagit kisitseqqittariaqarpugut.
Pinngortitaleriffimmeersoq Fernando Ugarde naapertorlugu kingusinnerpaamik ukiut 15-it qaangiuppata kisitsisoqassaaq aningaasaqarnerli nukissallu allat apeqqutaapput.
- Kingusinnerpaaamik ukiut 15-it. Ukiut tallimat qulilluunniit qaangiuppata kisitsinissamut aningaasaateqanngilagut, Fernando Ugarde oqarpoq erseqqissaatigalugulu, uumasut assigiinngitsut nunatsinni kisinneqaannavittussaasut taakkulu piffissaqarfigalugillu aningaasassaqarfigineqartussaapput.
AAMMA ATUARUK Nanoq kaattoq nannunit ikiliartortuneersuusoq
