WWF: -Nannut peqatigalugit inuuneqassagutta, amerlanerusunik pisassiineq aqqutissaanngilaq

Nannut aallaaneqartassapput aamma pisassiissutit amerlisariaqarput.

Kommune Kujallermi borgmesterimit Stina Egedemit (IA), savaatillit peqatigiiffianniit, KNAPK-miit aamma Ittoqqortoormiini piniartumit, ulluinnarmini nannunik inuunermini qalipaasersorneqartumit ersarissumik naatsumik isumaqatigiissutaasumillu isumaqartoqarpoq.   

-Qangalili kissaatigilerpara nannut tamarmik Ittoqqortoormiinut apuuttut aallaaneqartarnissaat, piniartoq Aage Hammeken tunumi illoqarfimmi najugaqartoq sapaatip akunnerani kingullermi oqarpoq.

Nipili allarluinnaavoq WWF aperigaanni.

- Ajornartorsiutaasumut aaqqiinertut isiginngilarput Kalaallit Nunaanni WWF-imi suliniutinut ataqatigiissaarisoq Malene Lynge oqarpoq.

Nannut allaaneqartassasut inuit ilaat isumaqartut, Kalaallit Nunaanni WWF-imit sulissutigineqarpoq inuit qimaasitsinissaminnik ilinniarinneqassasut. Assi © : Rasmus Mads Olsvig/KNR

Pinngortitaleriffimmi ummassusilerituumit Fernando Ugarte isumaqatigineqarpoq.

- Sillimanerulernissamut pisassiissutnik amerliliineq aaqqiissutaanngilaq. Pisassiissutissiinerup siunertaraa nungusaataanngitsumik piniartoqarsinnaanera, Ugarte oqarpoq.

Malene Lyngelli paasilluarsinnaavaa inuit puullaaqimmata pisassiissutillu amerlineqarnissaannik kissaateqarmata ajornannginnerusumillu nannunik aallaannissinnaalerusummata.

- Ersineq misigileraangatsigu taamatut pisoqakkajuppoq. Ersigisat peernissaat eqqarsaammiilersarput, oqarpoq. 

Tamannali ataavartumik aaqqissutaanngilaq.

Tassami sikorsuaqarnerulerneq nannullu takussaalernerat nalinginnaasunngussappat taava pisassiisarnerulernerup ulorianartumik nannunik nalaataqarnerit pinaveersaartinnavianngilaat naqissuserpaa.  

-Ilisimasat, periussat pilersaaarusiornerillu tamakkununnga pisunut aaqqiissutaapput eqqortuusut. Pisassiissuteqarnerit immini qaangerniagassanut aaqqissutaanngillat, ajornartorsiutinik nutaanik pilersitsiinnassapput, Malene Lynge oqarpoq.

Ungaluliinerit silassorissuusiarlu 

Nannut aallaasit atorlugit aqussinnaanngikkaanni, taava qanoq iliuuseqartoqassava? 

Malene Lynge WWF-imilu Kalaallit Nunaanni Danmarkimilu suleqataasa nannut pillugit qaangerniagassat pillugit Alaskami Canadamilu suleqatitik eqqartueqatigillattaasarpaat. 

-Assigiinngitsorpassuarnik aaqqissutissaqartoq, oqaluttuarpoq

Sumiiffiit ilaanni nannut ungalassimaartinniarlugit sarfalersukkanik ungalulersuisoqartarpoq. Sumiiffiit ilaanni nakkutilliinerit silassorissuusiarlu atorlugu aaqqiissuteqartoqartartoq.

-Nannunik ilisarsisarsinnaasarput soorlu nannunik nakkutilliisunut sms-inik nassitsisarsinnaallutik, taamaaliornikkullu nannut qimaatinneqarlutik Malene Lynge nassuiaavoq.

Alaskami suleqataasa silassorissuusiaq misiligartarsimavaat.

- Maani nunatsinni nannunik nakkutilliinermut suliaqarnitsinnut iliuusissanut ilanngukkusupparput tamannalu aamma Kalaallit Nunaata kujataani misilissinnaassavarput Malene Lynge oqarpoq.

WWF-ip Ittoqqortoormiini nannunik nakkutilliisui ukiut qulingiluassaat atuupput. Ukiumi atuarfiusumi ullaat tamaasa illoqarfimmi nanoqannginnera qulakkeerniarlugu nakkutilliisoqartarpoq. Assi © : WWF / Malene Lynge.

Aaqqiissutilli taamaattut akikitsuinnaanngillat. 

Inuit nannullu imminnut ajoqusersornatik ingerlaarsinnaanissaat qulakkeerniaraanni aningaasat pisariaqartut atornissaanut piareersimaneq pisariaqarpoq, naqissuserpaa.  

-Teknoligimut taamaattumut ineriartortitsinissamut aningaasaliissuteqanngikkaanni, taava iliuuseriniagaq pimoorussisuussanngilaq naammaginartumillu ineriartortitsinerunani Malene Lyngep erseqqissarpaa. 

-Aningaasaliissutissanik nassaarsinnaaganni tamaasalu aaqqiissutissanut atorluarsinnaasunut ineriartortitsissutigalugit pitsaanerusumik inerniliisoqarsinnaassaaq.