KNAPK: Sorleq pingaarnerua: nanoq inulluunniit?
![](/sites/default/files/styles/image_934x467/public/2024-04/Nikkulaat%20Jerimiassen_1.3.1.png?itok=p74wvdJ9)
Qilalukkap tuugaarsua qaqqorik Nikkulaat Jeremiassenip allaffiani nivingavoq. Aarrup niaquata saarnga teqeqqumi ilisivimmiippoq – nanorlu assilillugu qalipagaq iikkamiippoq.
Nannullu amerlivallaalersut, aalisartut piniartullu kattuffiata KNAPK-p siulittaasua isumaqarpoq.
- Nanoq nammineq qaasuttuugami piniartoq ulorianarluinnarpoq pikkorissorujussuaq. Taamaattumik maani nunatsinni pisarineqartarnissaa pingaarutilerujussuuvoq.
![](/sites/default/files/styles/image_934x467/public/2024-08/Fernando%20Ugarte%20isbj%C3%B8rn.jpg?itok=XhfVGpz4)
Nikkulaat Jeremiassenillu nannuttassiissutaasartut amerlineqallaquai.
- Taanna qangali sorsuutigaarput. Sualummik isorliunerusut eqqarsaatigalugit, minnerunngitsumillu aamma savaateqarfiit, taanna oqarpoq.
Nannut amerligaluttuinnartut qanillattortarnerisa aarlerinartoqarneranik KNAPK-p siulittaasua kisimi oqariartuuteqanngilaq.
Kujataani ukioq manna sikorsuaqarnerujussua pissutigalugu nanorpassuit inoqarfinnut qanillattortalermata nannuttassiissutit amerlineqarnissaannik, borgmesteri Stine Egede (IA) aamma savaatillit peqatigiiffiat kissaateqarput.
Tunumittaaq nannunik amerlanerusunik pisassiisoqartalernissaa Ittoqqortoormiini piniartup Aage Hammeken Danielsenip kissaatigaa.
- Pisassiissutit 35-t qaammatit pingasut iluanni piniartaratsigit. Ukiup sinnera isiginnaaginnartariaqartarpagut, taanna uani sapaatip-akunnerani siusinnerusukkut oqarpoq.
Nannut Ittoqqortormiinut qanillattukulapput. Nannummi marluk inunnut juulimi sapaatip-akunnerata ataatsip ingerlanerani qanillivallaarmata toqunneqarput.
Inuk nannumit pingaarnerusoq
Ukiumut nannuttassiissutit naalakkersuisunit aalajangerneqartarput.
Pinngortitaleriffiup innersuussineri nunallu tamalaat akornanni isumaqatigiissutit ilaatigut aallaavigalugit pisassiisoqartarpoq. Taama pisasseeriaaseqarneq piujuartitsineq eqqarsaatigalugu nannuttaassiisarnermik ilaatigut qulakkeerinninneruvoq.
Pinngortitaleriffiup paasissutissaatai naapertorlugu nannut Issittumiittut katillugit 20.000-it 25.000-illu missaanniipput. Qasserpiaalli nunatsinniinnersut tamakkiisumik ilisimaneqanngilaq.
Inatsisilli atuuttut pisasseeriaaserlu allanngortinneqartariaqartut KNAPK-ip Nuummi allaffeqarfiani isumaavoq.
Nannummi qimaasiinnartaraanni ajornartorsiut allamut nuunneqaannartartoq, Nikkulaat Jeremiassen oqarpoq.
- Nanoq taama illersorneqartuassappat inuit navialisut amerlissapput. Illersuinerlu taama annertutigimmat nannut nakkutigilluaqqissaanngikkaanni toqqissilluni angalaarneq, tupermiittarneq allallu pisinnaajunnaassapput, siulittaasoq oqarpoq.
- Killormut saatsillugu oqaatigilara: Nanoq inulluunniit sorleq pingaarnerua?, taanna aperivoq namminerlu akilluni:
- Inuk pingaarneruppat nanoq takkuttoq ingerlaannaq pisarineqartussaavoq aamma pisarineqartariaqarpoq.