Piniartoq: Nannut inoqarfinnukartut toqunneqartassasut qangali kissaatigaara
![](/sites/default/files/styles/image_934x467/public/2024-08/Aage%20Hammeken%202_0.jpg?h=440355b7&itok=uTnNKXTi)
Aage Hammeken Danielsen 36-nik ukioqarpoq, piniartuuvoq Ittoqqortoormiinilu najugaqarluni, nannullu ulluinnarsiutigalugit.
Nannut illoqarfimmut qanillattukkajupput, tamatigungajjallu illoqarfiup qeqqatigoortarlutik. Taanna oqarpoq.
- Nannut tikiukkaangata tupattarpugut, ingammik illoqarfitsinnut qanilligaangata, taanna oqarpoq.
Illoqarfianniiginnanngilarli, allatut aamma ajornartorsiutaapput.
Piniartut Ittoqqortoormiuni nunaqartut illuaraqarfiinut nannut ajornartorsiutaapput. – taakkununngami aamma aqqusaartarput.
- Nannut illuaqqat aserortertarpai, aasaagaluarpat ukiuugaluarpat, Aage Hammeken Danielsen oqaluttuarpoq.
![](/sites/default/files/styles/image_934x467/public/2024-08/Aage%20Hammeken%203%20isbj%C3%B8rn.jpg?itok=MoidHgo8)
36-nik ukiullip nammineq nannut aallaasarpai.
Ukiuni kingullerni nannut amerlatsittut misigaa.
- Killilersugaalernera nalaani eqqarsaatigalugu 2006-mi killilersorneqalermata massakkumut eqqarsaatigalugu amerlaneruleqaat, taanna oqarpoq.
Ukioq manna ulorianartorsiortitseqaat. Qaammat kingulleq sapaatit akunnerata iluani nannut marluk inunnut qanillivallaarmata aallaneqartariaqarsimapput.
Ilaatigut meeqqat arsaattarfimmi pinnguartut nannup qanillattorsimavaai.
Taamaammat WWF-i nanut patrulje siusinnerusukkut aallartippaat, tassa 25. juli aallartimmassuk. Pisarnermiit qaammat ataaseq sioqqullugu.
Ullaat tamaasa atuartoqarnerani illoqarfimmi angalasoqartapoq alapernaallugu nannunik tikiuttoqarsimaneranik.
- Ilaatigullu qimaatereerlugit uteqqittarput, Aage Hammeken Danielsen oqaluttuarpoq.
Apriilimi pisassat nungupput
Nannunniarneq januaarimi aallartittarpoq apriilimi maajimiluunniit pisassat tamarmik pisarineqareersimasarput.
- Pisassiissutit 35-t qaammatit pingasut iluani piniartaratsigit. Ukiup sinnera isiginnaaginnartariqartarpagut, Aage Hammeken Danielsen oqarpoq.
Ukioq manna pisassat qaffannissaat qinnutigigaluarpaat, itigartitaappulli.
Nannut akulikitsumik inoqarfinnut tikittalerneri aaqqiissutissatut eqqarsaatai suunerannik Aage Hammeken Danielsen KNR-mit aperineqarami, qulanngilaq:
- Qangali kissaatigaara, nannut tamarmik illoqarfimmut qanillattortut aallaaneqartassasut.
Pisassiissutit qaffattariaqartut taanna oqarpoq.
- Pisassiissuutit naammanngillat. 35-nnaassappata, ilimagisinnaavarput nannut illoqarfinnut qanillattortut amerlissasut, piniartoq oqarpoq.
Tunumi nannut qassiunersut ilisimaneqanngilaq.
Ukioq kingulleq siullermeerlutik nannunik kisitsipput, Pinngortitaleriffiullu kisitsisit qanittumi saqqummissasut oqaatigivaat.