WWF-ip nannunik alapernaarsuisartui aallartiaartut

Nannunik Ittoqqortoormiini ulluni kingullerni ulorianartunik siumuisarnerit pissutaallutik, pinngortitaq pillugu nunarsuaq tamakkerlugu suliniaqatigiiffik, Verdensnaturfonden, nannunik ullumimiit alapernaarsuisaleqqissaaq.

Verdensnaturfonden tusagassiorfinnut nalunaarummi taama allappoq.

Nannut marluk Ittoqqortoormiini sapaatit akunnerata ataatsip ingerlanerani aallaaneqarlutik toqunneqarput.

Nanoq Ittoqqortoormiini marlunngornermi unnukkut nalunaaqutaq arfineq-marluk qaangeraa tanneq sisamat missaani aallaaneqartoq, Kalaallit Nunaanni Politiit oqaatigaat.

Nanoq arsaattarfiup tungaanut meeqqat pinnguarfiata tungaanukartoq politiit oqaatigaat.

Nanoq alla Ittoqqortoormiini sisamanngornnermi ullaakkut aamma aallaaneqarpoq.

Kalaallit Nunaanni Politiit KNR-imut tamanna uppernarsarpaat.

- Ittoqqortoormiini nannumik ullumi toqutsisoqaqqittariaqarsimavoq. Ukiup imaasinerani pisut ulorianaateqartut marluk pereersimaneri ernumanarpoq, Malene Lynge, WWF Kalaallit Nunaanni pisortaq oqarpoq.

Ittoqqortoormiini nanoq angutip sapaatip-akunnerata aallartinnerani aallaavaa, nanormi angutip illuanut 5 meteripajaanik qanitsigivoq qimmiinullu qanillattorluni. Nannup meeqqat illoqarfiup arsaattarfiani pinnguartut ornileraluarpai. Assi © : Lone Andersen Madsen

Nannut angutivissat saluttut 

Nannut nerisassarniarlutik illoqarfimmut qanillivallaannginnissaat nannunik alapernaarsuisut pingaarnertut suliassaraat. Nannut Ittoqqortoormiinut qanillisartut amerlapput.

Verdensnaturfondenip nannunik alapernaarsuisui atuartut atualernisa nalaanni aggustip qiteqqunnerata missaani alapernaarsuilertarput, januaarimi nannunniartoqalersinnaanissaata tungaanut alapernaarsuisarlutik.

Nannut Ittoqqortoormiinut qanillivallaartut piffissap sivikitsup ingerlanerani marluunerat pissutaalluni nannunik alapernaarsuisartut sulinertik sapaatit akunnerata ataatsip ingerlanerani aallartereerpaat.