Videomik assilisat assillu: Nanoq Ittoqqortoormiini aallaaneqartoq
![](/sites/default/files/styles/image_934x467/public/2024-07/skudt%20isbjorn.jpg?itok=otRigvpR)
![](/sites/default/files/styles/image_934x467/public/2024-07/isbj%C3%B8rn1.jpg?itok=csdH33yV)
![](/sites/default/files/styles/image_934x467/public/2024-07/isbj%C3%B8rn%202.jpg?itok=derGUhOI)
![](/sites/default/files/styles/image_934x467/public/2024-07/isbj%C3%B8rn%203.jpg?itok=uYqi_c_Z)
![](/sites/default/files/styles/image_934x467/public/2024-07/isbj%C3%B8rn%205.jpg?itok=OBqn4sDU)
![](/sites/default/files/styles/image_934x467/public/2024-07/isbj%C3%B8rn%204.jpg?itok=-1xEs-oB)
Nanoq Ittoqqortoormiini aallaaneqartoq, Kalaallit Nunaanni politiinut marlunngornermi unnukkut arfineq-pingasunut qiteqqutilertoq nalunaarutigineqarpoq.
- Sianerluni nalunaarutiginnittup ilisimatippaatigut uini nannumik aallaannissimasoq. Nanoq siumugaat meterinik tallimaannarnik ungasitsigaluni silataannut pilluni qimmit sakattaatigalugit meeqqat arsaattarfimmi pinnguartut tungaannukaleruttortoq uiata aallaasimavaa, politiit pigaartuisa pisortaat Anette Ostenfeldt KNR-imut oqarpoq.
Videomik assiliisoq: Allan Pike Madsen
Nanorli Nuup kujasissuani ataasinngornermi siumorneqartoq toqqissiviilliortitsingaanngilaq. Nanoq siumorneqartoq Nuup eqqaani ulluni kingullerni ingerlaartoq umiatsiartunit inuilaamilu illuaqqaniittunit takuneqartarpoq.
- Kangerluarsunnguit paavanni Amitsumi ingerlaartoq ippassaq ullup qeqqata missaani nalunaarutigineqarpoq. Amitsumi illuaqqamiittut nalunaaruteqartuupput, nanorli qanoq qanillisimatiginersoq naluara, politiit pigaartuisa pisortaat oqarpoq.
Nalunaaruteqartut illuaqqamiit ingerlaqqinnissaminnut kingorna ikiorneqarput. Taakku aallaasilisarsimanngitsut, politiit oqarput.
- Pisoq Aalisarnermut Piniarnermullu Naalakkersuisoqarfimmut akisussaasuusumut ippassaq nalunaarutigaarput. Amitsumilu nanoqartoq Aasiaat Radiokkut aamma kalerriutigaarput.
- Nannumik takunnittoqarneranik ippassaq ullup qeqqata missaani nalunaarfigineqarattali nannumik takunnittoqarneranik nalunaarfigineqaqqinngilagut, Anette Ostenfeldt oqarpoq.