Aasarsiortarfimmi nanoq: Kusanaq!
- Innaqqammerluta, sanilerput Cunop nanoq illutta tungaanut ingerlasoq kalerriutigalugu sianerfigaatigut. Takuniarlugu ingerlaannaq massippugut.
Qoornumi aasarsiortarfiutilik Hans Gerstrøm taama oqaluttuarpoq.
Qoornoq Nuumminngaanniit 50 kilometerinik ungasitsigisumiippoq, Nuumminngaanniillu akunneq ataaseq akunnerullu affaq missaani angalalluni tikinneqarsinnaalluni.
Hans Gerstrøm erninilu sapaatip akunnerani matumani aasarsiortarfimmiinniipput, nanorlu Qoornumut qanillisimasoq pingasunngormat unnukkut tusatsiarpaat.
- Tikikkiartortoq tusaratsigu tikiunnersoq marsikumisaarlugu unnuk naallugu qinngusersorpugut.
- Ungasissumiissasoq takorpiarsinnaanavianngikkippullu naatsorsuutigigaluarparput, Hans Gerstrøm oqaluttuarpoq.
Saniliat sianeriasaarmat, uumasorujussarlu qaqortoq illuaraata eqqaaniittoq takugamikku aallaamarsuataarlutik oqaluttuarpoq.
Video: Hans Gerstrøm
- Tassa kusanaq! Misigisaq tupinnarluinnarpoq.
Nanoq angisoorujussuusoq, ilorrisimaarpasittoq kaappasinngitsorlu, eqqissiivillunilu illuaraata eqqaani angalaarujoortoq, Hans Gerstrøm oqaluttuarpoq.
- Eqalunnik quitsinni panertitarpugut, kaassimasuuguni nerisimasinnaagaluarpaai, oqaluttuarpoq.
- Pujoorivik kuniorpaa, naatsiivitsinnilu sivikitsumik pisulaariarluni ingerlaqqippoq. Ingerlanera kusanaqaaq.
Naalakkersuisoqarfik paasitinneqareerpoq
Nanoq ataasinngormalli Nuup eqqaaniilerpoq, angallatiniitttunit illuaqqaniittuniillu arlalinnit takuneqarluni.
- Kangerluarsunnguit paavanni Amitsumi ingerlaartoq ippassaq ullup qeqqata missaani nalunaarutigineqarpoq. Amitsumi illuaqqamiittut nalunaaruteqartuupput, nanorli qanoq qanillisimatiginersoq naluara, politiit pigaartuisa pisortaat pingasunngormat ullaakkut oqarpoq.
Nalunaaruteqartut illuaqqamiit ingerlaqqinnissaminnut kingorna ikiorneqarput. Taakku aallaasilisarsimanngitsut, politiit oqarput.
- Pisoq aalisarnermut piniarnermullu naalakkersuisoqarfimmut akisussaasuusumut ippassaq nalunaarutigaarput. Amitsumilu nanoqartoq Aasiaat Radiokkut aamma kalerriutigaarput.
Nanoq Qoornumi kingullermik takuneqarsimasoq, Kalaallit Nunaata Politiivisa sisamanngornermi ullaakkut nalunaarutigaat.
Aallaaneqassanngitsoq neriiutigigaa
KNR-ip Hans Gerstrøm sanilimini kaffisortoq oqarasuaatikkut oqaloqatigaa, ippassarlu pisoq eqqartorlugu.
Hans Gerstrømip oqarnera naapertorlugu, Qoornumi inuit eqqissisimapput.
- Tamatta oqaloqatigiittarput, pisorlu pillugu allaqatigiissinnaaniarluta Messengerimi gruppeliorluta. Eqqissisimavugut, inuillu anillattaalereerput, taanna oqarpoq, namminerlu anissamaarluni nangilluni oqarluni.
Video: Hans Gerstrøm
Hans Gerstrømip nanoq Sermersuup tungaanukarsoraa.
- Taama isumaliorpugut. Naluarpulli, taanna oqarpoq.
Hans Gerstrøm erninilu aasarsiortarfimminni aallaasilisanngillat.
- Siatsiveqarpugut ukusartoqarlutalu, Qoornumeeqatigulli aallaasilisarrapput.
Aallaneqassanngitsorli neriuutigaa.
- Kusanarpoq, aallaaneqassappat uggornassaaq. Ajoqusiinngilarmi kaappasinnanilu. Aallaaneqassanngitsoq neriuutigaara.
