Nannunut qimaasaarutit Qaanaami Nanortalimmilu atorneqartussat pisiarineqartut

Nannunut aallaat qimaasaarut Ittoqqortoormiini iluatsilluarmat, imassanik piseqqittoqartoq, Aalisarnermut piniarnermut nunalerinermullu naalakkersuisoq, Jens Imannuelsen, Inatsisartunut ilaasortamut Sofia Geislerimut akissuteqarnermini allappoq.

- Aallaat qimaasaarut ajunngilluinnartuusoq aammalu siunertaasoq naapertorlugu sunniuteqartoq uppernarsarneqarsinnaavoq, Jens Immanuelsen allappoq.

Taamaattumik imassanik Ittoqqortoormiini atugassanik piseqqittoqarpoq. Taassuma saniatigut aallaasinik marlunnik Qanaami Nanortalimmilu atugassanik pisisoqarsimasoq naalakkersuisoq allappoq.

- Qaanaami Nanortalimmilu kommunemi sulisunut oqartussanullu allanut attuumassuteqarsinnaasunut nassiunneqassapput taakkununngalu atortussanngortinneqassallutik, Jens Immanuelsen allappoq.

Ittoqqortoormiini piniarnermut nakkutilliisoq juuni qaammat filmiliamik Naalakkersuisunut nassiussivoq. Tassani aallaat qimaasaarut nannunut ajornartorsiutaasunut qimaatitsiniutitut qanoq pitsaatiginersoq takutinneqarpoq.

- Piniarnermut nakkutilliisup aallaat atoreeraangamiuk Naalakkersuisoqarfimmut nalunaaruteqartarpoq, Jens Immanuelsen allappoq.

Aallaasit qaqugu Qaanaamut Nanortalimmullu nassiunneqassanersut atorneqarsinnaalissanersullu akissummi allaqqanngilaq.