Politiit ullormut nalunaarutaat: Nannumik nunaqarfimmi takunnittoqarpoq umiatsiaararlu sikumut kiggigussaavoq
Niaqornarmiut sapaammi ullaakkut arfineq-pingasut qaangeraa siumukkaminnut takusaminnut tupaallalaavissorput.
Takusaammi tassaasoq nanoq puttasumiittoq, Kalaallit Nunaanni Politiit ataasinngornermut pigaartuisa pisortaat Jeppe Andsager oqarpoq.
- Nanoq taanna qimaasaarneqarnani nammineq ingerlaqqippoq, tassa navianartorsiortitsinngilaq toqunneqarnanilu, taanna oqarpoq.
Umiatsiaaraq sikumut kiggigussaasoq
Kingorna allamik pinartoqanngeriarluni politiinut sapaammi unnukkut arfineq-marluk missaanni nalunaarutiginnittoqartoq, politiit pigaartuisa pisortaat oqarpoq.
Tassa umiatsiaq pingasunik issimasulik Ilulissat avannaanni nunaqarfiup Qeqertap eqqaani sikumut kiggigussaasimasoq politiinut nalunaarutigineqarpoq.
- Umiatsiaarartut angutit pingasuusut sikumut ikaariarlutik umiatsiaaraq kiggigussaaqqassoq sikumit amuaat, sikuunerali pissutigalugu ikiunasuariartoriaannaasimanngitsut, Jeppe Andsager oqarpoq.
Politiilli angallat sikunik aserorterutaasinnaasoq angutit pingasut puulukerfigisaasa qanittuaniittoq attavigereerlugu, angutit pingasut aalisariummit tassannga aaneqarput.
- Angutit taakkua ajunngillat, sikumilu puulukeqqanerminni navianartorsiorsimanngillat. Taqussersimapput, atisassamaasisarsimapput oqarasuaatitigullu atassuteqarsinnaasimallutik, Jeppe Andsager oqarpoq. Aalisariut ikiuinasuartoq Ilulissanut utimukaleruttortoq, taassuma ilanngullugu ilisimatitsissutigaa.
Pisiffimmut tillinniartoqartoq
Poltiit Maniitsumi tillinniartoqarneranut atatillugu innuttaasunit aamma ikioqqupput.
- Maniitsumi Pisiffimmut ataasinngornermut unnuaani pingasut sisamallu akornanni tillinniartoqarpoq, politiillu inuusuttut arfinillit Pisiffimmiittut naammattoorpaat tigusarinagilli, Jeppe Andsager oqarpoq.
Taamaammat politiit Maniitsumi pisumut ilisimannittoqarpat attavigeqqupput. Kalaallit Nunaanni Politiit 70 14 48-mut sianerfigalugit attavigineqarsinnaapput.
