Tunngaviusumik inatsisitaarnissaq: Namminiilivinnissamut aningaasaqarnikkut pilersaarusiornissaq Aaja Chemnitz Larsenip ujartoraa
Tunngaviusumik inatsisissaq pillugu isumalioqatigiissitap nunatta namminiilivinnissaanut tunngaviusumik inatsisissamut 2021-mi naammassineqartussamik missingiusiortussanngornera akisussaassuseqanngitsuliorneruvoq.
Folketingimut ilaasortaq Aaja Chemnitz Larsen taama isumaqarpoq. Nunatta ukiut marluinnaat qaangiuppata namminiilivinnissaanut pilersaaruteqaranilu ilitsersuuteqannginnera isornartorsiorpaa.
AAMMA ATUARUK Nunatta namminiilivinnissaanut tunngaviusumik inatsisissamut missingersuusiortoqassaaq
- Nunatsinni innuttaasunut nalinginnaasunut kingunerisassai annertuupilussuussapput. Taamaammat isumaqarpunga Kim Kielsenip nunatsinni innuttaasunut danskillu ministeriunerannut unneqarilluni qanoq pisoqarnissaanik nassuiaasariaqartoq, Aaja Chemnitz Larsen oqarpoq.
Danmarkip nunatsinnut ataatsimoortumik ukiumut tapiissutigisartagai ullumikkut 3,85 milliardit koruuniupput. Nunatta karsiata isertitaata affai sinnerlugit.
Naatsorsuutillu taama isikkoqartillugit - Danmarkimiillu oqartussaaffinnik tigusinissamut tamatumalu qanoq aningaasalersorneqarnissaanut tigussaasumik pilersaaruteqanngitsillugu - Aaja Chemnitz Larsen isumaqarpoq nunatta nammiliivinnissaa Kim Kielsen isumalluarsaarutigivallaaraa.
AAMMA ATUARUK Siunnersuusiornermi Tunngaviusumik inatsit ataqqineqassanngitsoq
Nunarput erseqqissumik pilersaaruteqarani naalagaaffeqatigiinnit anissagaluarpat, tamanna Brexitip Tuluit Nunaanni perulluliuutigineqarneratulli issasoq Aaja Chemnitz Larsen isumaqarpoq.
- Tuluit Nunaata EU-mit maannakkorpiaq aniniarsarinermini sanngiitsigineratulli nunatta inissisinnaanera soorunami ernumassutigivara, Aaja Chemnitz Larsen oqarpoq.
Aningaasaqarnermut naalakkersuisoq, Vittus Qujaukitsoq, tunngaviusumik inatsisissap suliarineqarnerani akisussaaffeqartuusoq, attaveqarfiginiaraluarparput, sulili iluatsinngitsumik.