Suliakkiissut nutaaq: Nunatta namminiilivinnissaanut tunngaviusumik inatsisissamut missingersuusiortoqassaaq
Tunngaviusumik inatsisissaq pillugu isumalioqatigiissitaq nunatta namminiilivinnissaanut tunngaviusumik inatsisissamut missingersuusiussaaq.
Isumalioqatigiissitap suliassaanut nassuiaammi nutaami tamanna atuarneqarsinnaavoq. Taamaalilluni suliakkiissutip siuliani assortuussutigineqaqisoq, tassalu tunngaviusumik inatsisissamut marlunnik arloriarnilimmut missingersuusiornissaq, taamaatinneqarpoq.
AAMMA ATUARUK Siunnersuusiornermi Tunngaviusumik inatsit ataqqineqassanngitsoq
AAMMA ATUARUK Tunngaviusumik inatsisissatut siunnersuut isumaqatigiinngissutaasoq
Marlunnik alloriarnilimmik tunngaviusumik inatsisissamut missingersuusiuunneqartussaagaluartup immikkoortua siullermi nunarput Danmarkimut atassuteqarallassaaq immikkoortuatalu aappaa nunatta namminiilivinnerani atuutilissalluni.
Isumalioqatigiissitamulli taamani ilaasortat suliakkiissutigineqaqqaartoq akerleraat suliakkiissutigineqaqqaartorlu sakkortuumik oqallisigineqarpoq.
Namminiilivinnermullu taamani naalakkersuisup, Suka K. Frederiksenip, suliakkiissutigineqartoq malinneqassasoq piumasarisaraluaraa isumalioqatigiissitamut taamani siulittaasoq Vivian Motzfeldt naapertorlugu isumalioqatigiissitamut ilaasortat ataasiaannarluni alloriarnilimmik, tassalu tunngaviusumik inatsisissamut nunatta namminiilivinnerani atuutilertussamut, missingersuusiorneq aallaavigalugu sulipput.
AAMMA ATUARUK Tunngaviusumik inatsisissaq pillugu sulineq unitsinneqarallartoq
AAMMA ATUARUK Lars Løkkep tunngaviusumik inatsimmut sulinissaq paatsungassutigigaa
Taamani paatsuungasorpassuaqarpoq isornartorsiuisorpassuaqarlunilu. Aamma Inatsisartunut qinersisoqartussanngormat, isumalioqatigiissitaq ajornartorsiorfioqqilerpoq, ilaatigut siulittaasoq Naalakkersuisunut ilaasortanngorami isumalioqatigiissitamit tunuarmat.
Tunngaviusumik isumalioqatigiissitaq aningaasaqarnermut naalakkersuisup Vittus Qujaukitsup naggataatigut akisussaaffigilerpaa, suliassamullu nassuiaasiamini nutaami isumalioqatigiissitamut taamani ilaasortaasut piumasaannik tassalu tunngaviusumik inatsisissaq pillugu isumalioqatigiissitaq nunatta namminiilivinnissaanut tunngaviusumik inatsisissamut missingersuusiortoqarnissaanik suliakkiilluni.
Tunngavisumillu inatsisissaq pillugu aporaattoqannginnissaa Naalakkersuisunit kissaatigineqarsimasoq Vittus Qujaukitsoq KNR-imut oqarpoq.
- Inatsisartunit kissaatit suuneri sapinngisamik toqqammavigalugit sulinissamut toqqammavissat nassaariniarnikuuagut, taamaasilluni Inatsisartut Naalakkersuisullu suliamik sapinngisamik aporaaffiunngitsumik ingerlassisinnaanissaat qulakkeerniarlugu, Vittus Qujaukitsoq oqarpoq.
AAMMA ATUARUK Tunngaviusumik inatsisissaq pillugu suliaq uninngaqqippoq
