Assi: KNR

Tunngaviusumik inatsisissaq pillugu suliaq uninngaqqippoq

Tunngaviusumik inatsisissaq pillugu isumalioqatigiissitap sulinera uninngaqqippoq. Maanna siulittaasoqanngilaq, qinersinerlu unammilligassaqartitsivoq. Isumalioqatigiissitap sulineranut tunngavik allanngortinneqartariaqartoq, partiit illuatungiliuttut annerit marluk isumaqarput. Isumalioqatigiissitap uninngaqqinnera taakku iluarinngilaat.

- Isumalioqatigiissitaq aallartinnerlussimavoq. Taanna Inuit Ataqatigiinnit nassuerutigaarput, aamma qineqqusaarnerup nalaani, Inuit Ataqatigiit siulittaasuat, Sara Olsvig taama oqarpoq.

AAMMA ATUARUK Tunngaviusumik inatsisiliorniarneq aallaqqaataaniik

Aatsaat taamaalisoqanngilaq

Tunngaviusumik inatsisiliornissamut isumalioqatigiissitaq Inatsisartunit nukingiullugu 2016-imi ukiakkut suliarineqartoq sivisuumik uninngasareerpoq.

Siulittaasorlu Vivian Motzfeldt Inatsisartunut qaammat ataaseq affarlu matuma siorna qinersereernermi naalakkersuisunngorami isumalioqatigiissitamit tunuarpoq.

AAMMA ATUARUK Suka K.: Isumalioqatigiissitap sulinini nangeqqittariaqarpaa

Isumalioqatigiissitamilu maanna susoqassaneranik suli tusagaqarani, Sara Olsvig oqarpoq.

Aamma Demokraatit isumalioqatigiissitami ilaasortaatitaat, Nivi Olsen, tusagaqarsimanngilaq.

Taassuma maanna tusagaqareersimanissani naatsorsuutigisimagaluarpaa.

- Kina siulittaasuussava? Qanoq sammiveqassaagut? Taakku ersarissarneqartariaqarput. Inatsisartutut taama nalornerusaartinneqaannarsinnaanngilagut. Aamma inuiaqatigiit nalornerusaartinneqaannarsinnaanngillat, Nivi Olsen taama oqarpoq.Tamaangalu killissimaneq ajuusaarnartoq taanna isumaqarpoq.

- Aningaasat atorneqarmata, atorfilittallu qaammatit tamaasa aningaasarsisarmata, Nivi Olsen oqarpoq.

Qinersineq unammilligassaqartitsivoq

Isumalioqatigiissitamut suliakkiissutinut najoqqutassiaq naapertorlugu, partiit Inatsisartunut qinigaatitaqartut sinniisoqarniassammata arfineq marlunnik ilaasortaqassaaq, partiillu Inatsisartuni annerit sinniisuutitaqarnerussallutik.

Qinersinerulli kingorna partiit arfineq marluk Inatsisartunut ilaasortaatitaqalerput.

Suliakkiissutinullu najoqqutassiap naammassineqarnissaa maanna ajornakusuussammat, isumalioqatigiissitap sulineranut tunngavia Inuit Ataqatigiit allanngortittariaqarsoraat.

- Tassami isumalioqatigiissitamut suliakkiissut, kommissoria, nutaamik suliarineqarsimalluni Naalakkersuisuniit siunnersuutigineqarfigineqarumaartoq naatsorsuutigaarput. Tassami takusinnaagatsigu, massakkut ilusiligaanera pissutsinut massakkut piviusunngorsimasunut naapertuuppallanngitsoq, Inuit Ataqatigiit siulittaasuat Sara Olsvig oqarpoq.

 

AAMMA ATUARUK Tunngaviusumik inatsisissaq pillugu isumalioqatigiissitaq sulinerusariaqarpoq

 

Tamannalu Nivi Olsenip isumaqatigaa.

- Allatut aaqqiisoqartariaqartoq isumaqarpunga. Ataavaarnerusunik inuttalersorneqartariaqartutut uanga takorloorpara. Politikkikkut taarseraannerput, qinersinerillu tamaasa unitsinneqartarniarpat, aningaasat asuliinnaq atulunneqassapput, aammalu suliaq pitsaanavianngilaq, Nivi Olsen taama oqarpoq

KNR nunamut namminermut naalakkersuisumut, Vittus Qujaukitsumut, attaveqarniaraluarpoq, iluatsissinnaasimanaguli.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat