Olsvig: Tunngaviusumik inatsisissaq pillugu isumalioqatigiissitaq sulinerusariaqarpoq
Tunngaviusumik inatsisissamik piareersaalluni sulinerup 2018-mi naammassineqarnissaa naatsorsuutiginngilaa, kisiannili naatsorsuutigaaa tunngaviusumik inatsisissaq pillugu isumalioqatigiissitap sulinermini inatsisissami pingaarnerit ilanngullugit suliariumaaraat, sulinerminnilu innuttaasut peqataatinneqarnissaannut 2018-mi pilersaarummi piareersimasoqarnissaa
- Siullermik Tunngaviusumik Inatsisissap suliarineqarnerani innutaasut peqataatinneqarnerisigut suliarineqartariaqarpoq, tamanna Inuit Ataqatigiinnit erseqqissarparput.
Sara Olsvig taama oqarpoq, taassuma kissaatigaa, tunngaviusumik inatsisissami suut ilanngunneqassanersut isumalioqatigiissitap paasereertariaqarai.
AAMMA ATUARUK Tunngaviusumik inatsisissaq pillugu ataatsimiititaliap anguniakkani angujuminaatsissavai
Sara Olsvigip erseqqissaatigaa, tunngaviusumik inatsisissap suliarineqarnerani innutaasut peqataatinneqarnissaat ajornakusuussasoq, taamaattumillu isumalioqatigiissitamut kaammattuuteqarpoq suliaqaqqullugit pilersaarusiorlutillu.
Ajoqersuiartortutut periuseqartoqassanngilaq
- Tunngaviusumik Inatsisissap suliarineqarluni piareersarneqarnerani, ajoqersuiartortutut periuseqartoqassanngilaq, innuttaasulli piviusunik peqataatillugit suleqatigalugit, sulineq ingerlanneqartariaqarpoq, Sara Olsvig oqarpoq.
Isumalioqatigiissitaq 2017-mi upernaakkut pilersinneqarmalli, tunngaviusumik inatsisissamik sulinerup qanoq ingerlaneranik nutaarsiassanik annikitsuinnarnik isumalioqatigiissitamiit saqqummiussisoqartarpoq.
Sara Olsvig ilanngullugu oqarpoq, IA-p isumalioqatigiissitami ilaasortaatitai marluk iluaqutigalugit, tunngaviusumik inatsisip 2018-mi suliarineqarnera eqeersarneqassasoq.
AAMMA ATUARUK Tunngaviusumik inatsimmut missingiut 2018-imi naammassisariaqanngitsoq
Taassuma ilanngullugu oqaatigaa, isumalioqatigiissitap sulinera 2018-mi naammassineqarnavianngitsoq.
- Isumalioqatigiissitap sulinerani aamma tunngaviusumik inatsisiliornitsinni, immersugassatut imarisassai, aalajangersornissaat naammassissagai, minnerunngitsumillu innutaasunik peqataatitsinissamut peqataatitsinissamut pilersaarusiussasut, Inuiat Ataqatigiinnit piumasarineqartoq, Sara Olsvig oqarpoq.
Aningaasanut inatsisip 2017-mut atuuttup isumaqatiginniutigineqarnerani, tunngaviusumik inatsisissaq pillugu isumalioqatigiissitap sulinerata piffissalersornissaa paatsuungassutigineqalerpoq.
Namminiilivinnermut Naalakkersuugallartup Karl Kristian Krusep tusagassiuutinut nalunaaruteqarluni aalajangiusimallugu oqaatigaa, Isumalioqatigiissitaq immikkut ittumik halv million koruuninik aningaasaliiffigineqarneratigut tunngaviusumik inatsisissamut missingersuummik ukioq 2018 naalernerani naammassisaqarluarsinnaasut.
Tamanna pillugu Namminiilivinnermut Naalakkersuisoq Suka K. Frederiksen Naalakkersuisutut sulileqqinnermini oqaaseqarfiginngilaa.
