Immikkut ilisimasalik: Tunngaviusumik inatsisissaq pillugu ataatsimiititaliap anguniakkani angujuminaatsissavai
Apeqquterpassuimmi nalunartut isummerfigisussaagamigit ataatsimiititaliap innuttaasut naammattumik akulerutsissagunigit angumerisinnaanavianngikkaa tunngaviusumik inatsisinut immikkut ilisimasalik isumaqarpoq. Paasissutissammi kingulliit naapertorlugit ataatsimiititaliap inatsisissamut missingersuut 2018 naatinnagu tunniuttussaavaa.
AAMMA ATUARUK Innuttaasut peqataatinneqarnissaannik ilinniartut ujartuipput
Nunarput kunngikkunnut ataannassava imaluunniit præsidenteqalissava? Kalaallit Nunaat nammineq sakkutooqalissava, kikkut innuttaassuseqassappat aammalu kalaallit pingaartitaat qanoq tunngaviusumik inatsimmut ilanngunneqassappat?
Tunngaviusumik inatsisissaq pillugu ataatsimiititaliap sulinermini missingersuummut apeqqutit ilanngutassaasa ilaat tamakkuupput.
Hansen: Innuttaasunik peqataatitsinissamut ersarissumik pilersaaruteqanngilaq
- Tunngaviusumik inatsimmi tamakkuupput allassimasartut imaaliallaannaq aalajangiiffigineqarsinnaanngitsut, tunngaviusumik inatsisinut immikkut ilisimasalik Ilisimatusarfimmut atasoq Jens Wendel-Hansen taama oqarpoq.
Ataatsimiititaliap innuttaasut peqataatillugit apeqqutit akisassai ilaatigut tamakkuupput.
- Oqartariaqarpugut ataatsimiititaliaq tamakku pillugit oqallitsitsinissamik suli aallartitsiniarsimanngitsoq; qanoq ililluni innuttaasut tamakkerlugit tunngaviusumik inatsisissamik suliaqarnermini akulerutsinnissaannut pilersaaruteqarnersoq, Wendel-Hansenip uparuarpaa.
Sukumiisumik suliarineqanngippat asuli sulinerusinnaavoq
Erseqqissaatigaalu ataatsimiititaliap apeqqutit nalunartut assortuussutaasullu akissutissarsiniartussaagai, suliassarlu oqimaassagunartoq:
- Kalaallit naleqatitaannaalluunniit inatsimmut allannissaat ajornakusoorpoq, naleqartitammi suuppat. Tamakkuinnaalluunniit suliarinissaat sivisoorujussuussapput, Wendel-Hansen oqarpoq.
AAMMA ATUARUK Naagga - Isumalioqatigiissitami ilaasortat akissarsiaqartinneqassanngillat
Taamaattumik taanna isumaqarpoq piviusorsiorpasinngitsupilussuusoq tunngaviusumik inatsisissamut missingersuusiap ukiup ataatsip ingerlanerani suliarineqarsinnaanera.
- Sivisussangatitara tassaavoq innuttaasut akornanni suliarineqarnera, aamma politikerit innuttaasullu akornanni, taamaalilluni tunngaviusumik inatsisissamut ataatsimoortumik missingersuusiortoqarluni, politikerillu missingersuummik innuttaasunut nalornivallaaratik taasititsillutik, taamaanngippat suliaq asuliinnassaaq, taanna oqarpoq.
Wendel-Hansen oqaluttuarpoq Savalimmiut missingersuusiaqqaamminnut ukiut qulit atorsimagaat 2010-milu piareertoq suli innuttaasunit taasissutigineqanngitsoq.
Tunngaviusumi inatsissaq pillugu ataatsimiititaliami siulittaasoq Vivian Motzfeldt siusinnerusukkut KNR-imut oqarpoq ataatsimiititaliaq Nunatsinni inoqarfinnut angalasarumaartoq sammisassallu pingaaruteqartut oqallisigalugit. Suliarli annerusumik oqaaseqarfigerusunngilaa.
AAMMA ATUARUK Savalimmiuni tunngaviusumik inatsisissatut siunnersuut itigartitsissutigineqanngitsoq
