Nivi Olsen: Naagga - Isumalioqatigiissitami ilaasortat akissarsiaqartinneqassanngillat

- Tunngaviusumik Inatsisilerinermut Isumalioqatigiisitami ilaasortat Inatsisartunut ilaasortaapput, taamatullu atorfeqarnitsinni akissarsiaqareerpugut. Ilaasortap ataatsip amerlanerilluunniit isumaqarpata suliaq annertuallaartoq taava ilaasortap taamatut isumaqartup isumalioqatigiisitani ilaasortaaffini allamut ingerlateqqeriaannaavaa, Nivi Olsen, tusagassiuutinut nalunaarummi taama ilaatigut allaaserisaqarpoq, nangillunilu:

Aappaagumut aningaasanut inatsisissaq Inatsisartunit sapaatip-akunnerata siuliani akuersissutigineqarmat takuneqarsinnaavoq Isumalioqatigiissitamis siulittaasup Vivian Motzfeldtip, Siumumeersup, atorfimminut atatillugu inigisassaanut millionit koruunit affaat immikkoortinneqartut.

AAMMA ATUARUK Naalakkersuisut atorfilittut inigisassaamut aningaasanik immikkoortitsisut

Aningaasanulli inatsimmut oqaasertaliussat naapertorlugit, aningaasat immikkoortinneqartut isumalioqatigiissitami ilaasortat akissarsiaqartinneqarnissaannut aamma atorneqarsinnaapput, isumalioqatigiissitamulli suliakkiissutinut najoqqutassamut naapertuutinngilaq. Ima allaqqasoqarmat:

"Inatsisartutut akissarsiami saniatigut, Isumalioqatigiissitap ilaasortai akissarsiaqanngillat. Isumalioqatigiissitami ilaasortat, Inatsisartutut akissarsiaqanngitsut imaluunniit suliunnaarnersiutillit Isumalioqatigiissitami sulinerminnuttaaq akissarsiaqanngillat."

- Taamaattumik naagga - Isumalioqatigiissitami ilaasortat akissarsiaqartinneqassanngillat, Nivi Olsen, Demokraatineersoq, oqarpoq.

AAMMA ATUARUK Isumalioqatigiissitami ilaasortat akissarsiaqartinnissaat isumaqatigiissummut naapertuutinngilaq