Tusagassiuut: Isumalioqatigiissitami ilaasortat akissarsiaqartinnissaat isumaqatigiissummut naapertuutinngilaq
Sermitsiaq.AG taama allaaserisaqarpoq.
Aappaagumut aningaasanut inatsimmi, Inatsisartut ataasinngormat akuersissutigisaanni tamanna atuarneqarsinnaavoq. Tunngaviusumik inatsisissaq pillugu isumalioqatigiissitami siulittaasup Vivian Motzfeldtip (S) atorfimminut atatillugu inigisassaanut millionit koruunit affaat immikkoortinneqarput.
AAMMA ATUARUK Naalakkersuisut atorfilittut inigisassaamut aningaasanik immikkoortitsisut
Aningaasanulli inatsimmut oqaasertaliussat naapertorlugit, aningaasat immikkoortinneqartut isumalioqatigiissitami ilaasortat akissarsiaqartinnissaannut aamma atorneqarsinnaapput. Tamannali isumalioqatigiissitamut suliakkiissutinut najoqqutassamut naapertuutinngilaq. Ima allaqqasoqarmat:
"Inatsisartutut akissarsiami saniatigut, Isumalioqatigiissitap ilaasortai akissarsiaqanngillat. Isumalioqatigiissitami ilaasortat, Inatsisartutut akissarsiaqanngitsut (imaluunniit suliunnaarnersiutillit) Isumalioqatigiissitami sulinerminnuttaaq akissarsiaqassanngillat."
Aningaasanut inatsimmi akuersissutigineqartumi aamma atuarneqarsinnaavoq aningaasat qanoq atorneqarnissaat tunngaviusumik inatsisissaq pillugu isumalioqatigiissitamut suliakkiissutinut najoqqutassiamut ilassummi sukumiinerusumik nassuiarneqassasoq.
Akissarsialli sunut matussutaassanersut Vivian Motzfeldtip Sermitsiaq.AG-mut itisiliiffigerusunngilaa.
AAMMA ATUARUK Isumalioqatigiissitap siulittaasua periarfissamik ammaassisoq
Inatsisartuni attaviitsup Michael Rosingip, Tunngaviusumik inatsisissaq pillugu isumalioqatigiissitamut ataatsimiititaliaagallartumut aamma ilaasortaasinnaatitaasup, isumalioqatigiissitami ilaasortat akissarsiaqartinneqartussanngornerat isornartorsiorpaa.
- Tunngaviusumik inatsisissaq pillugu isumalioqatigiissitap suliassaasa nassuiaataannik Naalakkersuisut namminneerlutik allanngortitsisinnaanerat qularnartoqartittorujussuuara. Inatsisartut avaqqullugit tamanna pivoq, tamatumunnga tunngasumik ataatsimiititaliaq kisimi paasitinneqartussaammat. Taamani uanga tamanna uparuarnikuuara, maannalu Naalakkersuisut nammineq isumartik atorlugu sinaakkutit allanngortinniarlugit eqqarsarnersut takuarput, Sermitsiaq.AG-mut taama oqarpoq.
