Isumalioqatigiissitap siulittaasua periarfissamik ammaassisoq
Naalakkersuisut tunngaviusumik inatsisissamut isumalioqatigiissitamik pilersitsinissamut Inatsisartunit piginnaaffilerneqarmata, isumalioqatigiissitallu sulinissaanut pingaarutilinnik aalajangiisinnaanngormata, nuannattoqarpoq.
Nukingiunneqarlunili oqallisigineqarnera pissutigalugu unammillernartoqarpoq. Inatsisartummi isumalioqatigiissitallu Naalakkersuisullu aalajangigaannut naammaginninngillat.
Tunngaviusumik inatsimmik nunarput aatsaat namminiilivippat atuuttussamik taamaallaat siunnersuusiornissamik sulinissaq isumalioqatigiissitap siulittaasuata, Vivian Motzfeldtip, siornatigut piumasarigaluarpaa.
Namminiilivinnermulli naalakkersuisup, Suka K. Frederiksenip tunngaviusumik inatsimmik marlunnik alloriarnilimmik siunnersuusiornissamut suliakkiissutini aalajangiusimavaa. Tassalu tunngaviusumik inatsisip alloriarnermi siullermi danskit tunngaviusumik inatsisaata ataani atuutileqqaariarluni namminiilivikkutta sinnera atuutilernissaanik siunnersuusiornissamik suliakkiissut aalajangiusimallugu.
Assortuunneq
- Ataatsimiititaliaq kiffaanngissuseqarluni suleriaaseqassasoq oqariartuutigaarput. Taamaattorli suliassap allattorsimaffia naammassissallugu naammassissallugu pisussaaffigaa. Taannalu naammassineqarluni ingerlanneqassasoq naatsorsuutigaarput, namminiilivinnermut naalakkersuisoq, Suka K. Frederiksen KNR-imut oqarpoq.
Siumumeersut marluk, tassalu namminiilivinnermut naalakkersuisoq isumalioqatigiissitallu siulittaasua sapaatit akunnerni kingullerni assortuupput.
Inatsisinut ataatsimiisitaliaq tunngaviusumik inatsisissaq pillugu isumalioqatigiissitamik pilersitsinissamik siunnersuut pillugu ima allappoq:
- Annilaanngatigineqarsinnaavoq matuma kingornatigut kinguaariillu
tulliit tupigusuutigissagaat, imminnullu aperalutik ilumut tunngaviusumik inatsisissaq pillugu Kalaallit Nunaanni isumalioqatigiisitamik pilersitsinissamut aalajangiineq ima pingaaruteqanngissimatigisinnaasoq, allaat Inatsisartut innuttaasullu siunnersuummut isummernissaminnut eqqartuinissaminnullu sapaatip akunnerata naaneranik taamaallaat piffissaqartinneqarlutik.
- Aalajangiiffigisassatut siunnersuutip oqaasertalerneqarnera malillugu ilutsimisut iluseqartillugu akuersissutiginninnerup nassatarissavaa Naalakkersuisut tunngaviusumik inatsisissaq pillugu isumalioqatigiisitamik pilersitsinissamut piginnaatitaaffilerneqarnerat.
Tamanna ima paasineqassaaq, tassa Inatsisartut Naalakkersuisut nammineerlutik toqqagassanik qulaani eqqartorneqartunik aalajangiussisinnaatikkaat; tassa ilaatigut isumalioqatigiisitap suliassaata sunik imaqarnissaanut isumalioqatigiisitallu inuttalersugaanikkut katitigaaneranut apeqqutit pillugit. Tamanna aappaatigooqartutut paasineqarsinnaavoq, tassami toqqagassanik taakkuninnga aalajangiisussat Inatsisartuunissaat / Inatsisartuni ataatsimiititaliaanissaa nassuiaammi erseqqissumik piumasaqaataammat.
Najoqqutarisaq: Inatsisinut ataatsimiititaliap tunngaviusumik inatsisissamik pilersitsinissamut isumaliutissiissutaa
Tunngaviusumik inatsisissamut sulinissami apeqqut qitiusoq, tassalu tunngaviusumik inatsisimik nunatta namminiilivinnerani atuutilertussamik, imaluunniit marlunnik alloriarnilimmik suliaqarnissaq taakkua isumaqatigiinngissutigaat.
AAMMA ATUARUK Tunngaviusumik inatsisissamut isumalioqatigiissitap sulinera aallartippoq
Naalakkersuisulli inatsimmik marlunnik alloriarnilimmik suliaqaqqusinerat isumalioqatigiissitap siulittaasuata maanna periarfissaatilerpaa.
- Takussutissaqarpat tunngaviusumik inatsit, qallunaat ataanniittoq ikaarsaariarnertut atorneqassappat, taannalu nunatta tunngaviusumik inatsisissaanut pitsaanerpaamik aqqutissiuisutut isigineqarpat, taava soorunami taanna toqqarneqassaaq, Vivian Motzfeldt oqarpoq.
Naalakkersuisut kaammattuut malinngikkaat
Danskit tunngaviusumik inatsisaata ataani atuuttussamik tunngaviusumik inatsiseqarnissaq isumassaqartinnagu taassuma siornatigut oqaatigigaluarpaa.
Tunngaviusumik inatsisissamut isumalioqatigiissitamik pilersitsinissaq nukingiunneqarluni Inatsisartunit ukiakkut ataatsimiinnermi ulluni pingasuni oqallisigineqarmat, Naalakkersuisut isumalioqatigiissitaliornissaannut Inatsisartut pissaanilerpaat.
Inatsisinut ataatsimiititaliaq isumaliutissiissummini mianersoqqussuteqaraluartoq, tunngaviusumik inatsisissamut sulinissami apeqqutit qitiusut Inatsisartut isummerfiginngilaat. Inatsisartulli ataatsimik alloriarnilimmik tunngaviusumik inatsisissamik siunnersuusiortoqarnissaanik naatsumik kaammattuuteqarput.
Kaammattuulli taanna Naalakkersuisunit malinneqanngilaq, marlunnillu alloriarnilimmik siunnersuusiornissamik suliakkiissuteqarlutik.
AAMMA ATUARUK Tunngaviusumik inatsisissatut siunnersuut isumaqatigiinngissutaasoq
AAMMA ATUARUK Isumalioqatigiissitamut suliakkiissutinut najoqqutassiaq oqallisigineqassanngitsoq
