Savalimmiuni tunngaviusumik inatsisissatut siunnersuut itigartitsissutigineqanngitsoq
Tamanna ilaasortat siunnersuummik itigartitsissanerlutik aalajangiisussaaneranni pivoq.
- Taasititsisoqarmat amerlanerussuteqartut siunnersuummut itigartitsiniarnermut akerliupput, taamaammat siunnersuut siullermeerneqartussanngorpoq, nutaarsiassaqartitsivimmit KNR-itut ittumit, Kringvard Føroyamit, Beinta Løwe Jacobsen oqarpoq.
AAMMA ATUARUK Tunngaviusumik inatsisissatut siunnersuut akuersaarneqanngitsoq
Ataatsimiinneq unitsikkallarneqartoq
Ataatsimiinnermi minutsit arlalialuit ingerlariitsiartut Sambandspartiip, illuatungiliuttuusup siunnersuut qanoq isummerfiginiarnerlugu minutsit 15-it atorniarmagit ataatsimiinneq unikkallartinneqarpoq.
- Sambandspartiip siunnersuutip itigartitsissutigissagaa nalornissutigineqarsimanngilaq, tassami savalimmiut tunngaviusumik inatsisaani isumaqatigiissummi partii ilaanngilaq.
Savalimmiut nalunaaqutaa naapertorlugu aqqarnup qeqqartoq ataatsimiinneq aallartinneqaqqippoq, erngertumillu taasititsisoqarluni.
Amerlanerussuteqalaartut siunnersuutip itigartitsissutigineqannginnissaa qulakkeerpaat, taamaalilluni siullermeerneqarsinnaalerluni. Tamatumani tunngaviusumik inatsisissatut siunnersuutip itigartitsissutigineqarnissaanut taasisuni 33-usuni illuatungiliuttut ilaasortai, 16-it kisimik akuersipput.
Beinta Løwep savalimmiuni naalakkersuisut partiivisa Lagtingip inatsisilerituuisa innersuussutaanik malinninnginnerat tupaallaatiginngilaa.
- Naalakkersuisuni ilaasortat siunnersuummut itigartitsinissamut takussutissiinngillat. Naak inuppassuit katersuussimagaluarlutillu pissannganartorsiorfiugaluartoq, naatsorsuutiginngisamik pisoqanngilaq.
AAMMA ATUARUK Savalimmiormiut siunnersuutaata akuerineqarnera aqqutissiuisinnaavoq
Aqqut suli takisoq
Savalimmiut tunngaviusumik inatsisissaanut siunnersuut ullumikkut siullermeerneqaraluartoq savalimmiut tunngaviusumik inatseqalernissaanut aqqut suli takivoq.
- Eqqamaneqassaaq, Savalimmiut tunngaviusumik inatsisissaanut aatsaat siunnersuusiortoqanngimmat tamannalu ingerlariaqqiffiunngimmat. Taamaammat qanoq pisoqarumaarnera piffissap kisimi takutikkumaarpaa, Kringvarp Føroyamit tusagassiortoq, Beinta Løwe Jacobsen oqarpoq.
AAMMA ATUARUK Savalimmiormiut taasitinneqarnissaat kinguartinneqaqqippoq
Savalimmiut apriilip 25-ani inuiattut nalliuttorsiornerani tunngaviusumik inatsisissaq pillugu innuttaasunut taasititsisoqartussaanikuugaluarpoq, tamannali Lagtingip siunnersuummik akuersinissamut angummatinnginnera pissutigalugu unitsinneqarpoq. Savalimmiuni naalakkersuisut ukioq manna taasititsisoqarnissaa suli naatsorsuutigaat.
