Savalimmiormiut taasitinneqarnissaat kinguartinneqaqqippoq
Sermitsiaq.ag naapertorlugu Kringvarp Føroya taama nalunaaruteqarpoq.
Tamatumunnga pissutaavoq tunngaviusumik inatsisissaamut siunnersuut Lagtingit suliaralugu taasisoqartinnagu ukiup affaanik sioqqutsillutik naammassisinnaanngimmassuk.
Savalimmiuni inatsit malillugu taamaaliortussaapput.
Siunnersuummi pilersaarutaagaluarpoq oktobarip 25-iat tikitsinnagu Lagtingimi akuerineqareerpat innuttaasunit taasissutigineqassasoq.
- Siunnersuut Lagtingimut agguaanneraniit sapaatit akunneri arfinillit qaangiupput. Partiilli siulittaasui ullormi ataatsimi suleqatigiilluni inatsisissap oqallisiginissaanut ataatsimoornissamut katersorsinnaasimanngilagut, naalakkersuisut siulittaasuat lagmand Aksel V. Johannesen Kringvarp Føroyamut taama oqarpoq.
Aksel V. Johannesen oqarpoq suliaq taama pingaaruteqartigimmat angumerisinnaanagu nassuerutigisariaqartoq.
Taamaattumik siunnersuut Lagtingimi oktobarip 24-ianni siullermeerneqassasoq Sermitsiaq.ag allappoq.
Tamatuma kingorna partiinit tamanit peqataaffigineqartumik ataatsimiititaliortoqassaaq.
Aksel V. Johannesen taasititsinissamik kinguartitsilluni siullermiilinngilaq. Pilersaarutaasimagaluarpormi ukioq manna inuit taasitinneqarnissaat.
Taasititsinissarli Aksel V. Johannesenip nutaamik ullulerusunngikkallaraa Sermitsiaq.ag allappoq, ilimagineqarporli ukioq ataaseq missiliorlugu qaangiuppat taamaaliortoqarumaartoq.