Tunngaviusumik inatsisissaq: Suka K.: Isumalioqatigiissitap sulinini nangeqqittariaqarpaa
Namminiilivinnermut, nunanut allanut nunalerinermullu naalakkersuisoq Suka K. Frederiksen tusagassiuutinut taama nalunaaruteqarpoq.
Naalakkersuisup tusagassiuutinut nalunaarummi erseqqissaatigaa, isumalioqatigiissitami siulersuisoqatigiit suliakkiissutigineqartut tunngaviusumik inatsisissaq suliakkiissutinut najoqqutassiaq tunaartaralugu suliassarigaat.
Isumalioqatigiissitap sulinini novembarip aallartinnerani unitsippaa, Isumalioqatigiissitami ilaasortat Mala Høy Kuko aamma Ane Hansen ilaasortaaginnassanersut nalornissutigineqarmat.
Inatsisartut Naalakkersuisullu suliakkiissutigisaat aalajangiussaallu suliassatut aallunneqannginneri ajuusaarnarluinnartoq, namminiilivinnissamut naalakkersuisoq isumaqarpoq:
- Isumalioqatigiissitami ilaasortat partiiminniit toqqagaanertik tunngavigalugu ilaasortaapput, taamaattumik Isumalioqatigiissitami siulersuisoqatigiit taakku taamatut toqqagaasimanerat aalajangersaavigisinnaanngilaat, naalakkersuisoq oqarpoq, imalu nangilluni:
- Isumalioqatigiissitaq sakkortunerpaamik kaammattorpara tunngaviusumik inatsisissaq pillugu sulinera nangeqqullugu, massakkullu paasillugu kaammattuineq Isumalioqatigiissitamit soqutigineqarsimanngitsoq, tamannalu akisussaasutut Naalakkersuisutut iliuuseqarfiginiarlugu. Tunngaviusumik Inatsisissami suliaqartoqarnera qulakkeerneqartariaqarpoq, taamaattumillu pisinnaatitaaffigitinneqartut iluanni pisarialimmik aalajangiutoqartariaqarpoq, naalakkersuisoq Suka K. Frederiksen oqarpoq.
