Lars Løkke Rasmussen.Assi: Jonas Fievé/KNR

Lars Løkkep tunngaviusumik inatsimmut sulinissaq paatsungassutigigaa

Tunngaviusumik inatsisiliornissamut isumalioqatigiissitami suna suliarineqassanersoq ministeriunerup Lars Løkke Rasmussenip Folketingep oqaluttarfiani marlunngormat paatsuungassutigaa.

Tunngaviusumik inatsisiliornissamut isumalioqatigiissitap suliassai pillugit Kalaallit Nunaanni taamaallaat paatsuungasoqanngilaq, isumalioqatigiissitammi Kalaallit Nunaata oqaluttuarisaanerani pingaaruteqarnerpaajugunartoq tunngaviusumik inatsit suliarisussaavaa.

- Taamaammat oqaannartariaqarpunga, allaffinniit aammalumi uani oqaluttarfimmiit isigalugu, isumalioqatigiissitap suliassai maannakkuugallartoq erseqqissivinngilaq, Lars Løkke Rasmussen marlunngormat oqarpoq.

Ministeriunerup Folketingimut nassuiaatigaa namminiilivinnissamut naalakkersuisup Suka K. Frederiksenip ministeriuneq 26 april ilisimatikkaa tunngavissumik inatsisiliornissamut isumalioqatigiissitap sulinera.

Ministeriunerup maluginiarpaa isumalioqatigiissitaq tunngaviusumik inatsimmik immikkoortunik marlunnik suliaqassasoq aappaa naalagaaffeqatigiinnerup iluani atuuttussaq, aappalu kalaallit nunaat namminersulivippat atuuttussaq.

Tusagassiuutinut nalunaarummi akerleriittunik maluginiagassaqartoq

- Isumalioqatigiissitap suliassaa tassaavoq Kalaallit Nunaanni tunngaviusumik inatsisissamik suliaqarnissaq, Lars Løkke Rasmussen oqarpoq.

Isumalioqatigiissitaq siullermeertumik ataatsimeereersorlu isummanik assigiinngilluinnartunik naammattuugassaqarnera malugisimallugu Lars Løkke Rasmussenip nassuiaatigaa.

- Isumalioqatigiisitap suliassai allaganngorlugit suliassatut allassimasut isumalioqatigiissitamiit ataatsimiissutigineqareersut, tusagassiorfinnullu nalunaarutigineqartut atuarlugit imarisaani akerleriittunik maluginiagassaqarpoq, ministeriuneq Lars Løkke Rasmussen oqarpoq.

Isumalioqatigiissitap siulittaasua Vivian Motzfeldt (S) marloqiusamik suliaqarnissaminut isornartorsiuingaatsiarsimagaluartoq sapaatip akunnerani uani inussiarnernerusumik nipeqalerpoq.

Tunngaviusumik inatsimmik marlunnik alloriarnilimmik siunnersuusiornissamut Naalakkersuisut suliakkiissutaat pitsaanerpaatut nalilerneqassappat suliarissallugu KNR-imut ataasinngormat oqaatigaa.

- Kisianni tunngaviusumik inatsisissamut kigaallassaatitut aporsaatitullu inissisimassappat taava aamma periuseq alla atortariaqassavarput, isumalioqatigiissitap siulittaasua ataasinngormat taama oqarluni naqissusiivoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat