Tunngaviusumik inatsisissaq pillugu sulineq unitsinneqarallartoq
Tunngaviusumik Inatsisissamut Isumalioqatigiissitamut tunngasoq isumaqatigiinngissutaaqqilerpoq.
Isumalioqatigiissitami sulineq novembarip aallartisimalerneranili siorna unitsinneqarpoq, Isumalioqatigiissitami siulittaasoq KNR-mut taama ilisimatitsivoq.
Isumalioqatigiissitami ilaasortat qanoq katitigaassanersut nalornissutigineqarmat, Isumalioqatigiissitami sulineq unitsinneqarallarpoq, Vivian Motzfeldt (S) taama oqarpoq.
Ajornartorsiutip qitia tassaavoq, siulittaasup oqarnera naapertorlugu, Isumalioqatigiissitami Atassut sinnerlugu ilaasortatuaasoq, Mala Høy Kuko, taanna Atassummi ilaasortaajunnaarluni Siumumut nuummat aamma IA-p ilaasortaatitaata aappaa Inatsisartunit sulinngiffeqarallarnissaminik qinnuteqarmat.
Uani pineqarpoq Ane Hansen IA, Inatsisartunit sulinngiffeqarallarnissaminik qinnuteqarpoq, Qeqertalik Kommunemi borgmesteritut atorfini isumagissagamiuk. Taakkualu pissutigalugit, Isumalioqatigiissitap sulinini unitsittariaqarsimallugu.
AAMMA ATUARUK Tunngaviusumik inatsisissaq pillugu isumalioqatigiissitaq sulinerusariaqarpoq
Vivian Motzfeldtip oqarnera naapertorlugu, Isumalioqatigiissitami kikkut ilaasortaasinnaanersut pillugit Naalakkersuisunut paasiniaalluni Isumalioqatigiissitaq saaffiginnissimasoq, akissuteqarnissaallu maanna utaqqineqartoq.
Isumalioqatigiissitap sulinerata unitsinneqarsimanera, Ane Hansenimit naammagineqanngilluinnarpoq. Taannami isumaqarpoq, Vivian Motzfeldtip siulittaasutut sulinini naammassisinnaanngikkaa:
- Isumalioqatigiissitaq siulittaasoqartariaqarpoq, Tunngaviusumik Inatsisissap imaanik illersuilluni sulerusuttumik, siulittaasoqassanngilaq suliaminik unitsitsisumik, aamma inatsisartuni ilaasortaasunik taamaallaat ilaasortaqarniartumik, Ane Hansen KNR-mut taama oqarpoq
AAMMA ATUARUK Isumalioqatigiissitaq nunatta naalagaaffinngornissaanut sulissutiginnilersoq
Motzfeldt: Paasisaqarnissarput utaqqivarput
Vivian Motzfeldt oqarpoq, Isumalioqatigissitaq Naalakkersuisunut novemberip ulluisa tallimaanni saaffiginnissimasoq, Mala Høy Kukop Ane Hansenillu inissisimanerisa nalornissutigineqarnerat akissutissarsiniarlugu, taamaattumillu Isumalioqatigiissitap sulinera unitsinneqarallartoq.
Vivian Motzfeldtip innersuussutigisinnaanngilaa, inatsisartunut ilaasortaanngitsut Isumalioqatigiissitami ilaasortaasinnaannginerat sumi allaqqanersoq.