Namminersorlutik Oqartussat suliffeqarfiutaat millionilikkaanik amigartooruteqartoq

Nalik Venturesip, Namminersorlutik Oqartussanit pigineqartup ukiumoortumik nalunaarusiani pingasunngornermi saqqummersippaa. Tassanilu suliffeqarfik 2022-mi 82 millionit koruuninik amigartooruteqartoq takutinneqarpoq.

Suliffeqarfik siunnersuinermik, suliffeqarfinnullu aallarnisartunut, aallarterlaanut pilersinneqareersunullu aningaasaliinermik suliaqartarpoq.

Amigartooruteqarneq arlalinnik pissuteqarnerarneqarpoq.

Aatsitassarsiutileqatigiiffimmut Greenland Ruby-mut katillugit 33 millionit koruuninik appartitsineq initunerpaavoq.

Appartitsineq tassaavoq nalinganut nalikillititsineq. Tassa arlaannik nalilimmik nalikinnerulersitsineq.

Tamatuma saniatigut Nalik Venturesip akilerarutitigut naatsorsuutit 26 millionit koruuninik nalikillilernissaat pisariaqartissimavaa, soorlu aamma suliffeqarfiup ingerlanneqarnerani 12 millionit koruuninik amigartooruteqartoqartoq.

"Naammagisimaarnanngitsoq"

Amigartooruteqangaatsiarnerlu nammagisimaarutiginangitsoq, siulersuisut siulittaasuat, Miki Lynge oqarpoq.

- Amigartooruteqarneq namminermi akuerineqarsinnaaneq ajorpoq, Miki Lynge KNR-imut oqarpoq.

Taassuma amigartooruteqangaatsiarneq suliffeqarfimmik ingerlatsinermi aalajangersimasumik aarlerinartaqartumi suliaqarnermik tunngavilersorpaa.

Miki Lyngep oqarnera naapertorlugu Nalik Venturesip ingerlanneqarnerani aningaasaatit arlerinartumiittarput, tassa aningaasaliiffigisani aningaasanik annaasaqarnissaq aarlerinartuusarpoq.

- Inuiaqatigiinni ingerlatsivinnut aningaasaliilluta ikiuiniarsarivugut. Matumani Greenland Ruby ilaatigut aningaasaliiffigaarput, tamannalu inuiaqatigiinnut suliffissaqartitsinikkut inuussutissarsiornikkullu nutaanik periarfissaqartitsisoqarnissaa neriuutigigaluarparput. Tamanna venturesip aningaasaataanik ingerlatsinerup ilagaat, siulersuisut siulittaasuat oqarpoq.

Periusissiaq nutaaq

Miki Lyngep siunissaq eqqarsaatigalugu Nalik Venturesip amigartooruteqarnera ingerlanneqarneranut aningaasaliiffiillu iluatsitsiviujuaannaannginnerannik suliffeqarfillu taamaalilluni aningaasanik annaasaqarsinnaaneranik pissuteqartutut immikkoortikkusunneruai.

- Aarlerinartunik ilaatigut isiliisariaqartarpugut, tassanilu tamatuma inuiaqatigiinnut tamanut iluaqutaalersinnaassanera neriuutigalugu. Nalik Ventures taamaammat pisinnittunit pilersinneqarpoq.

Suliffeqarfiup periusissiartik allanngortitileruttoraat Miki Lyngep oqaatigaa, taamaalilluni nunatsinni periarfissanut – ilaatigut mittarfinnut nutaanut tunngatillugu naapertuutissalluni.

Naalakkersuisut siulittaasuat, Múte B. Egede ataatsimeersuarnermi oqalugiarpoq, taassumalu ukioq manna angusat ilorrisimaarutiginagit ilaatigut oqaatigaa.