Royal Greenlandip akiitsui 1 milliard koruuninik amerlisut
- Akiitsut taama annertuseriarneri pillugit mianersortoqartariaqarpoq.
Aningaasarsiorneq pillugu ilisimasalik Niuernermik Ilinniarfimmilu ilinniartitsoq, Ole Buch Hansen, taama ersaritsigisumik oqarpoq.
Taassuma Royal Greenlandip ukiumoortumik nalunaarusiaa kingulleq atuarpaa, aalisakkerivissuullu akiitsuisa annertuseriarnerat ernumanissamut tunngaviulluarsinnaasut oqaatigalugu.
Royal Greenlandip akiitsui siorna 1 milliard koruuninik amerleriarput maannalu akiitsut katillugit 2,9 milliard koruuninik amerlassuseqarlutik.
Tamannali kisimi ernumananngilaq - aalisakkat nutaat qerititsivimmiittut amerliartorput - taakkulu qaqugorsuarmut uninngasuutigineqarsinnaanatik.
- Ernumanartoq alla tassaavoq, qerititsivimmiittuutit aningaasanngorlugit 500 millioner koruuninik nalillit uninngasuutigineqalersimaneri. Tassami taakku ullussaminnik qaangiisinnaapput qaqugorsuarmullu uninngasuutigineqarsinnaanatik, Ole Buch Hansen oqarpoq.
Aningaasarsiornerput ajoquteqanngilaq
Niuernermik Ilinniarfiulli atorfilittaa ernumasariaqanngitsoq, Royal Greenlandip aningaasarsiornermut pisortaa Niels Kinnerup oqarpoq:
- Pissutsit ilisimaarilluarpagut. Akiitsut amerlavallaalersimaneri nassuerutigaarput, taakkuli ingerlatsinermik pissuteqarput. Taamaattumik qisuariarpugut qanorlu iliuuseqarluta. Aningaasanik uninngasuuteqarluarpugut taamaattumillu aningaasarsiornerput ajoquteqarani.
Saattussanik avammut tunisineq appariarsimasoq taamaattumillu qerititsivimmiittuutit uninngaannalersimasut, Nils Kinnerupip oqaatigalugu aamma kilisaatinik nutaanik pisiortortoqarsimasoq, taakkulu ilaatigut pissutaallutik akiitsut amerleriarnerat oqaatigalugu.
- Kilisaataatigut pillugit siunniussarput attatiinnarparput, taakkumi siunissamut aningaasaliinerupput. Ilisimalluarilluarparpullu akiitsugut annertusiumaartut aamma ilisimaaralutigu tamanna qaangerumaarlutigu taamatullu akisussaassuseqanngitsumik aningaasanik ingerlatilinnginnissarput ilisimaarilluarlutigu.
Aalisakkerivissuaq Namminersorlutik Oqartussanit immikkuullarissumik tapersersorneqartoq
Niuernermik Ilinniarfimmi atorfilittap, Ole Buch Hansenip Royal Greenlandip akiliisinnaajunnaarnissaa soorunami ilimaginngilaa tassami aalisakkerivissuaq Namminersorlutik Oqartussanit immikkuullarissumik tapersersorneqarmat.
- Royal Greenlandi suliffeqarfissuuvoq pingaarutilik, taamaattumillu akiliisinnaajunnaarnissaa ilimanarani. Taama pisoqalissagaluarpat Namminersorlutik Oqartussanit annaanneqassaaq taamaattumilli taassuma akiitsoqarnera soqutaarujussuarani.
Ole Buch Hansenilli ataasiinnaq ajornartorsiutaasoq oqaatigaa, tassa Namminersorlutik Oqartussanit ikiorneqarunnaarluni nammineq ingerlalernissani suli ilikkanngimmagu.
- Tunisassianik aningaasarsiornerunissarput qanilliartorusukkaluarparput taamaattumillu Royal Greenlandi nammineersinnaanerusariaqaraluarluni. Taamaaliorunimmi akiitsut ikilisissinnaalluarpaat.
