Royal Greenland 235 millioninik sinneqartooruteqartoq
Royal Greenlandip 2022-mi sinneqartoorutit 235 millionit koruuniusut ataasinngornermi saqqummersippai.
Raajat qalipallit, uusut qalipaajakkallu aamma qalerallit coronap nunarsuaq tamakkerlugu tuniluutilinnginneratulli aningaasanik ilaatigut isertitaqaataaqqipput. Saarulliit aamma siuariaateqarput.
Royal Greenlandip pisortaanerata, Susanna Arfelt Rajamandip angusat ilorrisimaarutigai.
- Ukiumi angusat naammagisimaarnartut pissuseqatigiiaanik nunatta imartaaneersunik aallussatsinnik, ingerlalluarsimasunik, tunngaveqarput. Aallussat tuniniaanerup Covid-19-ip tuniluunnerata nalaani unammillernartoqangaatsiarsimagaluartut kingorna 2021-ip naanerani siuariartuinnarsimapput, Susanne Arfelt Rajamand tusagassiuutinut nalunaarummi oqarpoq.
Angusat suliffeqarfissuup ukiuni kingullerni kilisaatinut nutaalianut ilaatigut aningaasaliissuteqarneranik pissuteqarput.
Royal Greenland allarpassuit assigalugit aningaasat naleerukkiartorneranit aamma eqqugaaqqavoq, tamannalu malunniuteqarpoq. Suliffeqarfissuup russinut niuerneq tamarmi ilaatigut unitsippaa, taamaalillunilu 100 millionit koruunit missaat annaavai.
Ineriartorneq tamanna aningaasap naleerukkiartungaatsiarneranik peqquteqarpoq, ingammillu Ruslandip Ukrainemik tiguaanerata kingunerisaanik nukissamut akit qaffakkiartornerannik peqquteqarpoq. Qaammatini kingullerni ingerlanerliortoqalermat ajornartoorneq niuerfinni Europamiittuni nalorninartoqalersitsivoq, Susanne Arfelt Rajamand nassuiaavoq.
Saattuannik tuniniaaneq Royal Greenlandip naatsorsuutaanut aamma malunniuteqarluarpoq. Saattuannimmi tunisaqarneq 2021-mili 50 procentit sinnerlugit kinguariaateqarpoq. Tamanna Amerika Avannarlermi niuerfiit tunisaqarnerisa appariaateqarneranik akiisa qaffasingaatsiarnerannik ilaatigut pissuteqarpoq.
Royal Greenland naapertorlugu ukioq manna unammillernartoqaraluartoq siornatigut angusat naligaat.