Naleraq Demokraatillu siuariartut

Nalunaaqutaq 01.40 nutarterneqarpoq...

Qinersiviit pilersaarutit malillugit maanna tamarmik matusimalerput kisitsinerlu tassa aallartilluinnarpoq.

Nuummili nalunaaqutaq arfineq-pingasunngortoq taaserusuttut suli siuleriiaammata taasiviusup ammaffissaa akunnerup affaanik sivitsorneqartoq attaveqaqatigiinnermi pisortaq, Rosannguaq Rossen oqarpoq.

Pissanganarsiartortoq

KNR-ip nunatsinni ataatsimoorfiusut alakkarterpai, taakkunanilu nuannattoqarlunilu pissangasoqarpoq.

Qinersivinni 72-ini taasinerit kisinneqarneranni nunarput tamakkerlugu pissanngalluni utaqqisoqarpoq.

Kingullermik 2021-mi qinersisoqarmat taasisut procentinngorlugit 66 procentiupput. Qinersiartortut maannakkut amerlanerussanersut partiillu sorliit qinersisartunit tatigineqarnersut unnuaru aatsaat paasinarsissaaq.

Taaguussinerit qinersivinnit arfineq-marlunnit maanna akuerineqarput taasinerillu 10 procentii kisinneqalereersimallutik.

Qeqertarsuaq

Qeqertarsuarmi qinersisut maanna kisinneqarsimalerput. Uanilu kikkut taaguunneqarnerpaasimanersut taaguunnikinnerpaasimanersullu ersarippoq.

Demokraatit Nalerarlu siuariarput Siumut IA-lu kinguariarlutik.

Qinersisut 41 procentii Demokraatinik qinersisimapput, 30 procentingajaalu Naleqqamik qinersisimallutik.

IA 2021-mi qinersinermut sanilliullugu 30 procentimik kinguariarpoq, Siumullu 15 procentingajammik kinguariarluni.

Jens-Frederik Nielsen qinerneqarnerpaalluni 100-nit taaguunneqarpoq Pele Brobergilu 68-init taaguunneqarluni tulliuvoq. Múte Bourup Egede Simigaq Heilmannitulli taaguunneqartigaluni taaguunneqarnerit pingajuuvoq.

- Nuannaartorujussuuvunga. Nunaqarfiit illoqarfiillu mikinerulaat siornatigut uagutsinnut immaqa taasineq ajortut soorlu uatsinnut saqissimasut. Taanna nuannaarutigaarput assorujussuaq. Aamma oqaatigerusuppara sassartitagut tamaasa assorujussuaq tulluusimaarutigaakka. Nuannaassuugut qanorluunniit inerneqarpat tamat oqartussaaqataanerat nuannaarutissaraarput, Jens Frederik Nielsen KNR-imut oqarpoq. 

Qasigiannguit

Qasigiannguani taasinerit maanna kisinneqarsimalerput. Naleraq Qasigiannguani taaguunneqarpaavoq.

Naleraq 153-init taaguunneqarpoq, Demokraatit 129-nit taaguunneqarluni tulliuvoq. Partiit taakku marluk kingullermik qinersisoqarneranit siuariarput.

Siumut taaguunneqarnerit pingajuulluni 101-init taaguunneqarsimavoq, kingullermillu qinersisoqarneranit 17 procentingajammik kinguariaateqarluni.

Inuit Ataqatigiit taaguunneqarnerit sisamanniilluni 95-init taaguunneqarsimavoq.

Qullerlu taaguunnikinnerpaalluni marlunnit taaguunneqarsimavoq.

Tasiilaq

Taaguussisut kisinneqartut amerliartuinnavipput, Tasiilamit inernerit piareerput.

Siumut 330-nit taaguunneqarluni unnummut siullermeerluni taaguunneqarnerpaavoq, Naleraq 323-nit taaguunneqarluni taaguunneqarnerpaap tulliuvoq.

Demokraatillu taaguunneqarnerpaat pingajuattut inissilluni 179-nit taaguunneqarsimasoq Inuit Ataqatigiit 129-nit taaguunneqarluni sisamaattut inissippoq.

Siumumit Lars Poulsen Tasiilami taaguunneqarnerpaalluni 187-init taaguunneqarsimavoq.

- Qiimavugut, nuannaarsuaarpugut. Nunaqarfiit uummateqarfigisorujussuugatsigit tassa misigisimagatta aamma nunaqarfinni neriuutit ajornerusumik ingerlasimasut ajornartorsiutaasunullu aaqqiissutissanik siunnersuuteqarpugt. Innuttaasut allannguerusupput, Aki-Matilda Høegh-Dam KNR-imut oqarpoq.

Paamiut

Paamiunit kisitsisit maanna piareerput.

Demokraatit 166-init taaguunneqarlutik taaguunneqarnerpaapput, Siumut tulliuvoq, taakkulu 152-inik taaguunneqarsimapput. Nalerarlu 138-nit taaguunneqarluni unnummut siullermeertumik taaguunneqarnerit pingajuanni inissisimavoq.

Qulleq aqqanilinnit taaguunneqarluni taaguunnikinnerpaavoq.

Ataasiakkaanik taaguussinerit qiniaraanni Demokraatit siulittaasuat katillugit 118-init taaguunneqarsimavoq. Múte Bourup Egede 73-init taaguunneqarluni tulliuvoq, Aki-Matilda Høegh-Damilu 72-init taaguunneqarluni taaguunneqarnerit pingajuuvoq.

Ittoqqortoormiit

Naleraq Siumullu siuariarpoq, IA-lu qinersinermi kingullermi taaguunneqarnermi sisamararterutaanit taaguunnikinnerulluni. 

Nunaqarfimmi qinersisinnaasut 77 procentii qinersiartorput, qinersisullu amerlanerpaartaat Naleraq qinerpaat, qinersisullu 63 procentiinit taaguunneqarsimalluni.

Nalunaaqutaq maanna unnuap-qeqqata qaangerpaa, qinersisullu 36 procentii maanna kisinneqarsimalerput.

Qaanaaq

Siumut qinersinermut kingullermut sanilliullugu siuarialaarpoq. Naleraq 13 procentingajannik siuariarpoq, IA-lu partiini kisiartaalluni kinguariarluni. IA 14 procentimik kinguariarpoq.

Uummannaq

Siumut kinguariarpoq, Naleraq Demokraatillu siuariarput. Demokraatit siulittaasuat, Jens Frederik Nielsen Uummannami aamma taaguunneqarnerpaavoq. Aki-Matilda Høegh-Damilu 116-init taaguunneqarluni taaguunneqarnerpaat tulliulluni.

Ilulissat

Demokraatit Ilulissani 1009-nit taaguunneqarluni taaguunneqarnerpaavoq. Demokraatit siulittaasuat, Jens Frederik Nielsen 577-init taaguunneqarpoq.

Naleraq taaguunneqarnerpaat tulliulluni 846-nit taaguunneqarpoq, Aki-Matilda Høegh-Damilu 413-init taagunneqarluni taaguunneqarnerpaamut tulliuvoq.

Múte Bourup Egede partiialu Inuit Ataqatigiit taaguunneqarnerpaat pingajuanniippoq, partii 382-init taaguunneqartoq siulittaasuat 246-nit taaguunneqarpoq.

Narsaq

Narsami IA suli taaguunneqarpaavoq, taamaakkaluartorli 18 procentingajammik kinguariarluni, Múte B. Egede parteeqatiminit Marianne Paviasen Jensenimit taaguunnikinneruvoq.

Marianne Paviasen Jensen Narsami 185-init taaguunneqarsimavoq, Múte B. Egedelu 188-init taaguunneqarsimalluni.

Nuuk

Nuummi taasinermi inernerit piareerput. Demokraatit 3602-nik taaneqarlutik siuttuupput, Inuit Ataqatigiillu 2899-inik taaneqarlutik tulliupput.

Naleraq 1556-inik taaneqarluni pingajuuvoq.

Inunnik taasinermi Jens Frederik Nielsen 2027-nik taaneqarpoq, Múte Bourup Egede 1676-inik taaneqarluni tulliuvoq.

Taasinerit kingulliit

Taasinerit 98 procentii kisinneqarsimalernerini naammassinialeqaagut. Maannamut qinersiartortut 68 procentiupput. Partiit siulittaasui KNR TV-mi maanna katersuupput.

Nutarterneqarpoq...