Politiet: Nakuusernermit videolianik siammarterineq unitsilli
Nuummi angutip inuusuttup allanit arlalinnit saassunneqarneranit, annersarneqarneranit tukkarneqarneranillu videoliaq inoqatinut attaveqaatitigut piffissami kingullermi siammarterneqarlunilu oqaasertaliiffigineqarpoq.
Taamali videolianik siammarterineq unioqqutitsineruvoq. Taamaammat Kalaallit Nunaanni Politiit nakuusernermit videolianik assilisanillu siammarterinermik unitsitseqqusipput.
- Maanna Kalaallit Nunaata politiiniit ilisimaneqalerpoq, oqarasuaatikkut filmilianik imaluunniit videokkut nakkutiginninnermik immiussanik akulikitsumik ingerlaartitsisoqartoq. Ammattaarlu politiiniit ilisimaneqarpoq politiini misissueqqissaartartut suliaanni oqarasuaatikkut immiussami ingerlaartitsisoqartoq, soorlu nakuuserfigitinnermik, politiit tusagassiuutinut nalunaarummi allapput.
Matumanilu Nuummi nakuusertoqarnera ilaatigut pineqartoq, Kalaallit Nunaanni Politiit misissueqqissaarnermut aqutsisuata, vicepolitiinspektørip Lars Bjerregaardip uppernarsarpaa.
- Nuup qeqqani decembarip 16-iani nakuusertoqarneranit videoliaq maanna siammarterneqaleruttorpoq. Tamannalu ilaatigut pissutigalugu videolianik ukuninnga siammarterineq inerteqqutaasoq oqaatigivarput, taanna oqarpoq.
Videolianik siammarterinermi inuit tamanut saqqummiunneqartariaqanngitsut ilisarineqarsinnaatinneqarput.
Tamatuma saniatigut politiit suliaqarnerannut aamma sunniuteqartarpoq.
- Pinerliisup videoliat uku takusinnaavaat, taamaalillutillu ujaarineqarlutik paasisinnaallugu. Tamanna pissutigalugu toqqorsinnaavoq, imaluunniit paasissutissanik videoliami ersittunik nunguterillutik. Taamaammat politiit misissueqqissaarnerat pissutigalugu videoliat uku siammarterneqassanngillat.
Politiit suliami pineqartumi videolianik inatsisinik unioqqutitsisumik siammarterinermi pasisaqarnerlutik Lars Bjerregaardip paasissutissiissutigisinnaanngilaa, pinerluttulerinermilli inatsimmik unioqqutitsineq unnerluutiginninnermik kinguneqarsinnaanerarlugu. Taassumalu nakuusertoqarneranik suliaq videoliami takutinneqartoq pillugu politiit ilungersorlutik suliaqartut erseqqissaatigaa.
- Videolianik siammarterinerit maanna misissueqqissaarfigileruttorpagut, aamma nakuusertoqarnera pillugu misissueqqissaarpugut. Misissueqqissaarnerput qanoq takutitsiumaarnersoq paasinarsiumaarpoq. Kisianni Nuummi nakuusertoqarnerani pineqartumi ilungersortumik suliaqarluta amerlasuut tassuni suliaqartippagut. Suliamilu tassani pinerluuteqartut marluk unnerluutigaagut.
