Politiit persuttaasoqarneranik takunnissimasussarsiortut
Angut saluttoq, naatsunik qernertunik nujalik, 170-180 centimeterit missaannik angissuseqartoq 20-t 30-llu akornanni ukioqartoq ujaarineqarpoq. Angut qaqortumik tujuuluaraqarpoq, qasertunillu qarleqarluni.
Kalaallit Nunaanni Politiit angut sapaatip akunnerata naanerani persuttaasimasutut maanna ujaarisaat taama nassuiaatigineqarpoq. Angummi alla 40-t naajartorneranik ukioqartoq Nuummi Ceresvej 5-imi arfininngornermi ullaakkut saassunneqarpoq.
- Angut kiinnamigut arlaleriarluni kasunneqarpoq, napparsimmaviliaanneqarlunilu. Angut ajunngilaq, Malik Olesen KNR-imut oqarpoq.
Angutit marluk politiit oqarnerat naapertorlugu imminnut attuumassuteqanngillat.
Saassunneq nalunaaqutaq 02-p aamma 03-p akornanni pivoq. Politiillu angummik saassussissumik maanna takunnissimasussarsiorput.
Arlaannik ilisimasaqaruit Kalaallit Nunaanni Politiit oqarasuaammut pingaarnermut 701448-mut sianerfigisinnaavatit.