Nakorsat qullersaat: Juullip ukiutoqqallu nalaanni sulisutigut pitsaasoorpasippoq
Nakorsat Sisimiuni amerlanernik nalinginnaasumik nakorsiartoqarnissaanut jannuaarip aappaata tungaanut ikippallaarput. Peqqinnissaqarfimmili sulisut juullip ukiutoqqallu nalaanni ikinnerunerat nalinginnaasuuvoq. Kalaallit Nunaanni Peqqinnissaqarfimmi nakorsat qullersaat, Aviaja Siegsttad oqarpoq.
- Nakorsiarnissamut sapaatit akunnerannik ataatsimik utaqqinani ulluni 14-ini utaqqinissaq ukiut tamaasa juullip ukiutoqqallu nalaani aarlerinarsinnaasarpoq. Tamannalu sumiiffinnut tamanut atuuppoq, Aviaja Siegstad oqarpoq.
Sulisut juullip nalaani sulinngiffeqassammata, nalinginnaasumik nakorsiarnissamut jannuaarip aappaata tungaanut piffissaliussat tamarmik inniminnerneqareertut, taanna paasissutissiivoq.
Nakorsat juullip nalaani nalinginnaasumik ikinnerusartut
Nalinginnaasumilli juullip nalaani nakorsiarsinnaasut ikinnerusarnerat nalinginnaasuusvoq.
- Tamani juullip ukiutoqqallu nalaanni periarfissakinnerusarpoq. Aamma Ilulissani, Qaqortumi Nuummilu napparsimmavinni taamaappoq.
Pinartoqartilluguli suli nakorsiartoqarsinnaasoq, nakorsat qullersaata erseqqissaatigaa.
- Ajoqusertoqarsimatillugu pinartoqarpat, saaffiginninnissaq periarfissaasuaannarpoq. Tamannalu tamani atuuppoq, Aviaja Siegstad oqarpoq.
Illoqarfinni annerni tamakkeqqangajattut
Taassuma maanna ernumanani ilanngullugu oqaatigaa.
- Maanna killiffimmi nunap immikkoortuani napparsimmavinni inuttaqarnikkut tamakkerluinnangajaqqapput. Qaqortumi inuttassat juullip ukiortaallu akornanni tamakkeqqapput, isumaqarpungalu Ilulissani aamma tamakkeqqapajaartut. Sisimiuni maanna marlunnik amigaateqarput ingerlaavartumilli atorfinitsinerit ingerlapput. Aasianni Tasiilamilu juullip ukiortaallu akornanni aamma tamakkerluinnangajaqqapput.
Inoqarfinnilu nakorsaqanngitsuniittut nunap ilaani peqqinnissaqarfinnit Nuummilu nakorsiartarfinnit nakorsanik attaveqarsinnaapput.
- Juullip ukiutoqqallu nalaani pitsaasoorpasippoq, nakorsat qullersaat oqarpoq.
Piffissamut inniminnersimasamut nakorsiarsinnaanngikkaanni nalunaartarnissaq aamma kaammattuutigaa.
