Nutaarsiassaqartitsivik: Trumpip sinniisoqarfik kilitsissianut atorniaraa, immikkut ilisimasallit naliliipput
USA sinniisoqarfimmini amerlanerusunik atorfinitsitsippat qanoq pisoqarsinnaanissaa, immikkut ilisimasallit arlallit Ekstra Bladetimut maanna oqaaseqarfigaat.
Naliliinerlu nalornisigineqanngilaq: Amerikamiut præsidentiata Donald Trumpip kilitsissianik atorfinitsitsinissaa ilimanarpoq.
Amerikap sinniisoqarfiata allaffeqarfia nuunneqassaaq. Issittumi Sakkutooqarfiup ungasinngisaani allaffeqarfeeqqamiit, Nuummi Imaneq 41-mi init quleriiaat allersaanni biilinut inissiivik ilanngullugu 3.000 kvadratmeterisut angitigisumut nuussasoq, DR allappoq.
Ersiinnarmi kilitsissiat
Ekstra Bladetip oqalotigisaasa ilagaat immikkut ilisimasalik, Jacob Kaarsbo. Taanna sillimaniarnermut politikkikkut siunnersortaavoq namminersortoq aamma illersornissaqarfiup isertortumik paasiniaasartuini misissueqqissaarnermi pisortaasimalluni.
Taassuma oqarnera naapertorlugu amerikap sinniisoqarfiata suliassaa tassaassaaq Donald Trumpip nunatsinnik tiguaaniarluni kissaataanut tapersersortaaneq. Taamaammat CIA-imeersunik NSA-meersunillu atorfinitsitsinissaq naleqquttuussaaq.
Amerikamiut nunani allani kilitsissiat aamma isertortumik paasiniaasartut CIA-p aqutarai, NSA-lu tusarnaarnernik aamma paasissutissanik assigiinngitsunik katersinernik, soorlu oqarasuaatitigut, mailitigut allatigullu katersinernik suliaqartuuvoq.
Kalaallillu USA pillugu isumaannik sunnerniarnissaat aqunneqalersinnaanissaallu anguniarneqassaaq.
- Amerikamiut taasagaattut 'covert operations'-imik aaqqiisoqassaaq, tassa amerikamiut anguniagaat pillugit malunnaarsaarluni isertortumik paasiniaasartunik sulisitsineq. Kalaallit Nunaannili inuiaqatigiit ikituinnaapput, Jacob Kaarsbo Ekstra Bladetimut oqarpoq.
Ajornartorsiungaatsialertoqarsinnaasoq
Amerikap Nuummi sinniisoqarfiata sukkanerpaamik matuneqarnissaa danskip politikerip Rasmus Jarlovip kissaatigigaa, KNR-ip siusinnerusukkut allaaseraa.
Sinniisoqarfik inuiaat kalaallit soqutigisaannik akornusersuisoq, politikeri isumaqarpoq.
Amerikamiunilli nunatsinneeqqusinnginneq ajornaatsuinnaanavianngilaq.
Dansk Institut for Internationale Studierimi ilisimatusartuuneq, Ulrik Pram Gad, Ekstra Bladetimut taama oqarpoq.
Kilitsissiatullu sulisoqarnera nunatta Danmarkillu arlaanni paasissagunikku kinguneqarnerlungaatsiassaaq.
- Inatsisit malillugit taakkunannga anisitsinissaq periarfissaavoq. USA-li qaninnerpaasaralugu iligaarput. Taamaammat anisitsilluni piviusunngortitsinissaq ajornartuaannartussaavoq, Ulrik Pram Gad oqarpoq.
