Danmarkimi politikeri: - Amerikap Nuummi sinniisoqarfia sukkanerpaamik matusariaqartoq
Amerikamiut Sisimiunut Nuummullu tikeraarnissaasa unitsinneqarnerata kingorna, Rasmus Jarlovimik apersuineq marlunngornermi ualikkut pivoq. Pisut allanngoraluartut politikerip isumaanik allannguinngilaq.
Amerikap Nuummi sinniisoqarfia matuneqassaaq. Taamak folketingimi Konservativt Folkepartiip Kalaallit Nunaannut tunngasunut oqaaseqartartua Rasmus Jarlov isumaqarpoq.
Taassuma sinniisoqarfiup inuiannik kalaallinik akornusersuisutut isigai.
- Amerikamiut iliuuserisaannut pingaarnertut sinniisoqarfik Kalaallit Nunaannik akornusersuisutut inissisimanera ajorsigaluttuinnartoq erseqqippoq. Tikeraarnermi maanna pisumi sinniisoqarfik iliuuseqartuusimavoq. Tamannalu akersaassanngikkipput isumaqarpunga.
Nunat akunnerminni attaveqatigiinnermi sakkoq sakkortuneq
Trumpip tiguaaniarluni nalunaarneranut kiisalu præsidentip tullersortaata nuliata tikeraarneranut naalakkersuisut siulittaasorigallagaata akuersaarsinnaanngilluinarpaa. Qallunaat ministeriunerata USA-mit tikeraartoqarnera aamma akuersaarnagu Kalaallit Nunaannillu tapersersuinini oqaatigaa.
Amerikamiunulli akiuuttoqarnerusariaqartoq, Rasmus Jarlov oqarpoq. Sinniisoqarfiup Nuummi siunertarisami akerlianik suliaqartoq taanna isumaqarpoq.
- Kalaallit Nunaat Danmarkilu akornusersoraat ersarilluinnarpoq, sinniisoqarfeqartinnissaannullu pisussaaffeqanngilagut. Sinniisoqarfeqartippagut pissutigalugu, Kalaallit Nunaannut iluaqutaasussanik suliffeqarfinnik ammaasoqarnissaa, takornariaqarnerulernissaa allatigullu Kalaallit Nunaata USA-llu akornanni ajunngitsumik attaveqaqatigiinnermik pilersitsinissaq siunertaammat.
Ukrainimi sorsuttoqaraluartoq Rusland Danmarkimi aallartitaqarfeqarpoq, aallartitanillu angerlartitsineq nunallu akunnerminni attaveqatigiilluarniarneranni iliuutsini sakkortunerpaanut ilaavoq. Sooq assuarinninnerup angerlartitsinerullu akornanniittumik iliuuseqarnani, taama sakkortutigisumik iliortoqartariaqartoq
- Sinniisoqarfiup Kalaallit Nunaat akornuserniarlugu sulinera pissutigalugu. Russit Københavnimi aallartitaqarfiani taamatut iliuuseqartoqanngilaq. Nuummi iliuuseqartoqarneratulli iliuuseqarnerinik paasisaqarnikuunngilagut. Isertuutinngilaalluunniimmi.
- Ruslandip ajorluinnartumik sorsunnera akerlerilluinnarparput. Russilli Københavnimi aallartitaqarfiannit Danmarkimut akornutaasussanik iliuuseqanngillat.
Naalakkersuisunik suleqateqarneq
Naak ileqquusumik Danmark nunanut allanut tunngatillugu politikkimik tamatumunngalu sinniisoqarfinnik akuersinissamut aqutsisuugaluartoq, amerikamiut Nuummi sinniisoqarfianik matoqqusineq pillugu aalajangiisoqassagaluarpat Namminersorlutik oqartussat qanimut suleqatigilluinnartariaqaraat, Rasmus Jarlov erseqqissaavoq.
- Kalaallit isumaqataanngippata sinniisoqarfiup matuneqarnissaa kukkunerussasoq isumaqarpunga. Matuneqartariaqaraluartorli uanga parteeralu isumaqarpugut.
- Pisoqarnerani maannatut ittumi Danmark Kalaallit Nunaallu iliuuseqaqatigiinnissaat pingaarutilerujussuuvoq, konservativip Kalaallit Nunaannut oqaaseqartartua naggasiivoq.
KNR-ip partiit siulittaasui amerikamiut sinniisoqarfiannik matusisoqaratarsinnaaneranut isumaannik tusarniaavigalugit attaviginiarsarai. Naalakkersuisoqatigiinnissamulli isumaqatigiinniartoqarnera pissutigalugu tamanna periarfissaanani. KNR suli oqaaseqartitsiniarsarivoq.
