Nuummi nakorsassaaleqineq pissutigalugu pinartuunngitsut utaqqissunneqartariaqartut

Dronning Ingridip Peqqissaavia nakorsassaaleqillunilu peqqissaasussaaleqivoq, taamaammallu nakorsiarnissamut piffissaleeqqissanatik, Sermersuumi nakorsat pisortaat, Jesper Olesen, oqarpoq.

- Inunnik amigaateqarutta, nakorsiartitsiffigisinnaasagut killeqalissapput, nakorsaq oqarpoq.

Dronning Ingridip Peqqissaavia pinartoqartillugu suli nakorsiartitsisassaaq, pinartuunngitsunilli nakorsiaatissallit ukiortaareerneranut utaqqisariaqarput.

AAMMA ATUARUK Ernisussat nakorsassaaleqisoqarnera pissutaalluni allamut erniartortariaqassapput

Inuilli nakorsamut oqarasuaatikkut suli saaffiginnissinnaapput, qaqugukkumi arlaat pinartuunersoq nalorninarsinnaasoq, Jesper Olesen oqarpoq.

- Taamaammat ajoqusersimasunut saaffiginnittarfimmukarluni utaqqinissaq pissusissamisoornersoq imaluunniit ajornartorsiutitaqanngitsumik ukiortaap kingornanut utaqqissussinnaanerlugu uagutsinnut saaffiginnilluni aperinissaq pissusissamisoorpoq, taanna oqarpoq.

Pinarsinnaasut tassaapput inuunermik annaasaqarnissamut imaluunniit innarlinnginnissamut tunngasut. Tassaasinnaapput anersaartorniarnermik ajornartorsiorneq, sakiakkut anniarneq, ilisimanerup allanngornera imaluunniit tallit niulluunniit aalatikkuminaatsinneri.

AAMMA ATUARUK Der er ingen hurtige løsninger på lægemangel

Jesper Olesen aamma nassuiaavoq, Nuummi innuttaasut peqqinnissaqarfiup tatineqarneranik ikiuussinnaasut, inuillu nakorsiarnissamut utaqqisarnerat sivikillisillugu.

Tassami nakorsiarfissaminni takkutinngitsuulerunik taamaatsitsiinnarnerminnik nalunaaruteqanngitsut amerlapput. Ullormimi ataatsimi nakorsiarniat affaat takkutinngitsoorsinnaasarnerat, nakorsat misilittagaraat.

- Taamaannera pitsaanngilaq. Nalunngikkutsigumi innuttaasut ukua nakorsiarfissaminni takkunnianngitsut, oqarasuaatikkut ullaakkut nakorsiartitsinitsinni nakorsiarusuttunik allani aggeqqusisinnaagaluarpugut. Kisianni tassa taamaliunngitsoortarpugut.

AAMMA ATUARUK Qeqertarsuup Tunuani aalajangersimasumik novembarimit nakorsaqarunnaassaaq

Jesper Olesen nassuiaavoq, nakorsiarfissamilu takkussinnaanngikkaanni oqarasuaatikkut imaluunniit nittartakkakkut  www.doktor.gl,-kkut nalunaartarnissamik kaammattuivoq.

Nakorsanik peqqissaasunillu amerlanerusunik januaarimi februaarimilu atorfinitsitsinissaq, taamaalillunilu nakorsiarnissamut piffissaleeqqissinnaalernissaq naatsorsuutigineqarpoq.