Ernisussat nakorsassaaleqisoqarnera pissutaalluni allamut erniartortariaqassapput
Peqqinnissaqarfimmi Diskomi nakorsanik atorfinitsitsiniarneq unamminarsimavoq.
Aasianni qitiusumik napparsimmavik pilaalluni ernisitsisinnaasunik erninermullu atatillugu aanaartoqarnerani ikiuussinnaasunik 2019-imi februaarip aallaqqaataanit sulisuerutissaaq.
Taamaattumillu Peqqinnissaqarfimmi Diskomi ernisussanik sullissineq 2019-imi januaarip qiteqqunneraniit allanngortinneqarallassaaq.
Ernisussanik sullissinerup allanngortinneqarallarnerata kingunerisaanik Peqqinnissaqarfimmi Diskomi naartusut, februaarip aallaqqaataata kingorna ernisussat Aasiannilu ernisussaagaluit Ilulissani Qitiusumik Napparsimmavimmut Nuummulluunnit erniartortinneqartalissapput.
- Ernisussap isumannaatsumik atugaqarnissaa qulakkeerniarlugu Peqqinnissaqarfimmi Diskomi ernisussanik sullissineq allanngortinneqarallarpoq. Allannguutillu naartusunut ilaqutaasunullu, Aasianni erninissamik naatsorsuuteqartunut, sunniuteqarnera paasilluarsinnaavara, naartusulli isumannaatsuunissaat eqqarsaatigalugu taamatut aalajangiisoqarnera erseqqissaatigissallugu uannut pingaaruteqarpoq, Peqqissutsimut Naalakkersuisoq, Martha Abelsen oqarpoq.
Aaqqiissutaagallartoq ukioq ataaseq qaangiuppat nalilersorneqassaaq.